طورخم میں پاک افغان سرحد کے قریب پہاڑی تودے میں دبی ایک اور لاش بھی نکال لی گئی ہے، جس کے بعد اب اس جان لیوا قدرتی حادثہ میں ہلاک افراد کی تعداد 8 ہو گئی ہے۔
پاکستان کسٹمز اور لوکل کسٹم کلیئرنگ ایجنٹس کی جانب سی فراہم کردہ معلومات کے مطابق ممکنہ طور پر ملبہ میں دبے ہوئے افراد کی تعداد 8 تھی، جن کی لاشیں برآمد کرلی گئی ہیں۔ برآمد کی جانے والی تمام لاشیں افغان شہریوں کی ہیں۔
ڈپٹی کمشنر ضلع خیبر عبدالناصر نے بتایا کہ ملبے سے آخری لاش بھی نکالنے کے ساتھ ہی ریسکیو اور ریلیف آپریشن مکمل ہوگیا ہے۔ سرچ اینڈ ریسکیو آپریشن عید کے روز بھی جاری رہا۔ مجموعی طور پر 13 کنٹینروں پر مشتمل 20 ٹرکوں کی ریکوری کی گئی ہے۔
ڈپٹی کمشنر کے مطابق ملبہ ہٹانے کا کام تقریبا 80 فیصد مکمل ہوچکا ہے جبکہ باقی ماندہ روٹ کلیئرنس آپریشن بھی بہت جلد مکمل کرلیا جائے گا- جبکہ این ڈی ایم اے کی ہدایات پر جیولوجیکل سروے اف پاکستان کی ٹیکنیکل ٹیم بھی پیر کے روز جائے حادثہ کا دورہ کرے گی۔
’ٹیکنیکل ٹیم جائے حادثہ پر مزید کسی بھی لینڈ سلائیڈنگ کے خطرے یا کلئیرنس کے متعلق اپنی رپورٹ مرتب کرے گی تاکہ اس کے مطابق پیشگی اقدامات اٹھائے جاسکیں۔‘
یاد ہے کہ 18 اپریل کو طورخم بارڈر پر افغانستان کے انتظار میں کھڑے کینٹرز پر پہاڑی تودہ گر گیا تھا۔ جس میں مال بردار کینٹرز کے ڈرائیورز اور کنڈکٹرز دب گئے تھے۔
