بانی چیئرمین پاکستان تحریک انصاف (پی ٹی آئی) اور سابق وزیراعظم عمران خان نے آئی سی سی چیمپیئنز ٹرافی میں قومی کرکٹ ٹیم کی ناقص کارکردگی بالخصوص بھارت سے شکست پر شدید غم و غصے کا اظہار کرتے ہوئے کہا ہے کہ جب عہدوں پر سفارشی لوگ بیٹھے ہوں گے تو کرکٹ تباہ ہوجائے گی، محسن نقوی کو جس عہدے پر بھی لگایا گیا اس نے بیڑا غرق کیا۔
یہ بھی پڑھیں: چیمپیئنز ٹرافی کی سیکیورٹی ڈیوٹی سے انکار پر لاہور میں 100 سے زائد پولیس اہلکار برطرف
اڈیالہ جیل راوالپنڈی کے باہر میڈیا سے گفتگو کرتے ہوئے عمران خان کی ہمشیرہ علیمہ خان نے کہا کہ عمران خان سے آج ملاقات ہوئی، وہ مکمل فٹ ہیں، ان کی صحت کے حوالے سے افواہیں پھیلائی گئی کہ وہ بے ہوش ہوکر گر پڑے تھے، اس حوالے سے عمران خان کو بتایا کہ باہر یہ خبریں چل رہی ہیں تو وہ ہنس پڑے۔
علیمہ خان نے کہا کہ عمران خان کو آج سب سے زیادہ غصہ کرکٹ پر تھا،انہوں نے پاکستان کا میچ پی ٹی وی پر دیکھا ہے، میچ ہارنے کی وجہ سے بانی نے سارا غصہ آج کرکٹ پر ہی اتارا، بھارت کے خلاف میچ ہارنے پر عمران خان کو بڑا دکھ تھا، بانی نے کیا جب سفارشی لوگوں کو بٹھایا جائے گا تو کرکٹ تباہ ہوگی، محسن نقوی کو پہلے چیف منسٹر لگایا اس نے ظلم کیا۔
انہوں نے کہا کہ محسن نقوی کو وزیر داخلہ لگایا تو انہوں نے ظلم کیا، محسن نقوی کو جس عہدے پر لگایا، انہوں نے بیڑا غرق کیا، پاکستان میں اتنے عہدے کسی شخص کے پاس نہیں، جتنے محسن نقوی کے پاس ہیں۔
یہ بھی پڑھیں: چیمپیئنز ٹرافی 2025: بارش کے باعث آسٹریلیا اور جنوبی افریقہ کے درمیان میچ منسوخ
علیمہ خان نے بتایا کہ عمران خان نے کہا اتنی بری کارکردگی پر عزت دار آدمی مستعفی ہوجاتا ہے لیکن محسن نقوی مستعفی نہیں ہوگا، محسن نقوی سے پوچھا جائے کہ ان کے پاس کرکٹ کا کیا تجربہ ہے۔
انہوں نے مزید کہا کہ عمران خان نے ہدایت کی ہے کہ میرے متعلق صرف پارٹی کے عہدیدار بات کریں، ڈسٹریکشن کے لیے خبر نکالی گئی کہ بانی بے ہوش ہوکر گر پڑے، بانی پی ٹی آئی اس بات پر ہنسے ہیں، ان کی صحت بلکل ٹھیک ہے۔
انہوں نے کہا کہ شکر ہے بانی کی ہفتے کے دن اپنے بچوں سے بات ہوئی تھی، ہم نے بچوں سے بات کی تو ہمیں تسلی ہوئی بانی ٹھیک ہیں، قاسم خان سوری ملک سے باہر ہے ان کو کیا پتا، ذرائع سے خبریں چلانا اور بالمشافہ ملاقات میں بہت فرق ہوتا ہے۔
یہ بھی پڑھیں: چیمپیئنز ٹرافی:آج اسلام آباد کے کونسے راستے کب سے کب تک بند ہوں گے؟
یاد رہے کہ کہ 23 فروری کو چیمپیئنز ٹرافی کے میچ میں بھارت نے پاکستان کو شکست دی اور یہ ایونٹ میں قومی ٹیم کی مسلسل دوسری شکست تھی اور اب پاکستان ایونٹ سے باہر ہوچکا ہے۔
