خواتین کے عالمی دن پر وزیراعظم محمد شہباز شریف نے اپنے پیغام میں کہا ہے کہ آج، خواتین کے عالمی دن کے موقع پر، ہم اس امر کی تجدید کرتے ہیں کہ خواتین ہمارے معاشرے کی معمار، ہمارے گھروں کا ستون، اور ہمارے مستقبل کو استوار کرنے میں اہم کردار ادا کر رہی ہیں۔
وزیراعظم آفس سے جاری بیان کے مطابق انہوں نے کہا کہ ہماری زندگیوں میں خواتین کا انتہائی اہم کردار ہے۔ کلاس رومز سے لے کر بورڈ رومز تک، میدانوں سے لے کر فرنٹ لائنز تک، پاکستانی خواتین ہماری قوم کے روشن مستقبل کو سنوار رہی ہیں۔
اس سال خواتین کے عالمی دن کا تھیم، ’تمام خواتین اور لڑکیوں کے لیے: حقوق۔ مساوات اور انہیں بااختیار بنانا‘ دراصل ایک عزم کا اعادہ ہے، جو ایک ایسا معاشرہ بنانے کی ہماری مشترکہ ذمہ داری کی یاد دلاتا ہے جس میں خواتین کا اہم کردار ہو۔ ہمارا مذہب اسلام خواتین کی عزت اور حقوق پر بہت زور دیتا ہے۔
مزید پڑھیں: خواتین کا عالمی دن: غزہ میں حاملہ خواتین کو ’قبل از صدی‘ جیسے حالات کا سامنا
حکومت پاکستان نے پالیسی سطح پر مداخلت، قانونی اصلاحات اور ادارہ جاتی تعاون کے ذریعے خواتین کے حقوق کو آگے بڑھانے میں اہم پیشرفت کی ہے۔ حقیقی صنفی مساوات کی طرف ہمارا سفر ابھی ختم نہیں ہوا۔ خواتین کو بااختیار بنانا پاکستان کی خوشحالی اور ترقی کے لیے ناگزیر ہے۔
جب ہم خواتین کی تعلیم، صحت اور معاشی آزادی میں سرمایہ کاری کرتے ہیں، تو ہم نہ صرف افراد بلکہ آنے والی نسلوں کو ترقی دیتے ہیں۔ آئیے! آج کے دن ہم خواتین کے حقوق کے احترام کو مزید آگے بڑھانے اور ایک ایسے پاکستان کی تعمیر کے لیے اپنی کوششوں کو تیز کرنے کے اپنے اجتماعی عزم کا اعادہ کریں جہاں ہر عورت کی صلاحیتوں کا ادراک ہو اور ہر بیٹی کا خواب اس کی پہنچ میں ہو۔
پاکستانی نوجوان خواتین صلاحیتوں سے مالا مال ہیں، وزیراعظم شہبازشریف
وزیراعظم شہباز شریف نے اسلام آباد میں جینڈر پیرٹی رپورٹ آئی سی ٹی کا اجرا کرتے ہوئے کہا کہ آج کی تقریب شاندار ہے۔ خصوصاً جنوبی پنجاب میں خواتین کی تعلیم سنگین مسئلہ تھا۔ خواتین کی تعلیم کے چیلنج سے نمٹنے کے لیے متعدد اقدامات کیے ہیں۔ پاکستانی نوجوان خواتین صلاحیتوں سے مالا مال ہیں اور مردوں کے شانہ بشانہ کام کر رہی ہیں۔
مزید پڑھیں: دنیا کے ایک چوتھائی ممالک میں خواتین کی صورتحال میں تنزلی ہوئی، اقوام متحدہ
وزیراعظم نے کہا کہ چائلڈ لیبر ایک بہت بڑا چیلنج تھا، میرے دور وزارت میں پنجاب کے بھٹوں سے چائلڈ لیبر کا خاتمہ ہوا۔ پاکستان کی معیشت کو مضبوط بنانے میں خواتین کا اہم کردار ہے۔ خواتین نے تحریک پاکستان اور اس کے بعد بھی ملکی ترقی میں اہم کردار ادا کیا۔ خواتین کا احترام ہم سب پر لازم ہے۔
انہوں نے کہا کہ بے نظیر بھٹو اسلامی دنیا کی پہلی خاتون وزیر اعظم منتخب ہوئیں۔ نصرت بھٹو اور کلثوم نواز نے آمریت کے خلاف کلیدی کردار ادا کیا۔ ایک عورت کی تربیت نسلوں کو بہتر بنا سکتی ہے۔ پاکستانی نوجوان خواتین صلاحیتوں سے مالا مال ہیں۔ مریم نواز بطور وزیراعلیٰ پنجاب عوام کی خدمت کررہی ہیں۔
وزیراعظم کا کہنا تھا کہ اپنے کردار سے خواتین پاکستان کی تقدیر بدل سکتی ہیں۔ پنجاب میں ہماری حکومت نے خواتین کے خلاف تشدد سے متعلق قانون سازی کی۔
