آرمی چیف جنرل سید عاصم منیر کی والدہ ماجدہ وفات پاگئیں جس پر صدر مملکت اور وزیراعظم سمیت دیگر اہم سیاسی قیادت نے افسوس کا اظہار کیا ہے۔
صدر مملکت
صدر مملکت آصف علی زرداری نے چیف آف آرمی اسٹاف جنرل سید عاصم منیر کی والدہ کی وفات پر اظہار تعزیت کرتے ہوئے کہا کہ ان کی وفات کے غم میں برابر کے شریک ہیں۔
صدر مملکت نے مرحومہ کے لیے بلندی درجات اور لواحقین کے لیے صبر جمیل کی دعا کی اور کہا کہ دُکھ کی اس گھڑی میں میری ہمدردیاں لواحقین کے ساتھ ہیں۔
وزیراعظم
وزیراعظم محمد شہباز شریف نے چیف آف آرمی سٹاف جنرل سید عاصم منیر کی والِدہ کے انتقال پر اظہار افسوس کا اظہار کیا۔
ان کا کہنا تھا کہ سوگوار خاندان کے دکھ میں برابر کے شریک ہیں، وزیراعظم کی مرحومہ کے لیے بلندی درجات کی دعا بھی کی۔
اسپیکر قومی اسمبلی
اسپیکر قومی اسمبلی سردار ایاز صادق نے بھی چیف آف آرمی سٹاف جنرل سید عاصم منیر کی والدہ ماجدہ کے انتقال پر گہرے دکھ اور افسوس کا اظہار کرتے ہوئے جنرل سید عاصم منیر اور ان کے اہلخانہ سے دلی تعزیت کی۔
اسپیکر قومی اسمبلی نے کہا ہے کہ سید عاصم منیر کی والدہ ماجدہ کے انتقال کی خبر سن کر دلی دکھ اور افسوس ہوا، والدین قدرت کا انمول تحفہ ہیں ان کا بچھڑ جانا ناقابل تلافی نقصان اور بڑا صدمہ ہے۔
چیئرمین سینیٹ
اس کے علاوہ چیئرمین سینیٹ سید یوسف رضا گیلانی نے بھی آرمی چیف جنرل عاصم منیر کی والدہ کے انتقال پر گہرے دکھ اور افسوس کا اظہار کیا اور مرحومہ کے بلند درجات کے لیے دعا کی۔
انہوں نے کہا کہ جنرل عاصم منیر کی والدہ کی وفات کی خبر سن کر انتہائی دکھ ہوا، اللہ تعالی جنرل عاصم منیر اور ان کے خاندان کو صبر جمیل عطا فرمائے، دکھ کی اس گھڑی میں جنرل عاصم منیر کے ساتھ کھڑے ہیں۔
اس کے علاوہ وفاقی وزیر برائے امور کشمیر، گلگت بلتستان و سیفران انجینئر امیر مقام، نائب صدر پیپلز پارٹی سینیٹر شیری رحمان سمیت دیگر سیاسی شخصیات نے بھی اپنے پیغامات میں آرمی چیف جنرل عاصم منیر کی والدہ ماجدہ کے انتقال پر گہرے افسوس اور لواحقین کے ساتھ ہمدردی کا اظہار کیا ہے۔
