پاکستان تحریک انصاف کے بانی چیئرمین اور سابق وزاعظم عمران خان نے صوبہ خیبرپختونخوا کے وزیراعلیٰ علی امین گنڈاپور اور کے پی کے مشیر برائے اطلاعات بیرسٹرسیف کو اسٹیبلشمنٹ سے مذاکرات کرنے کی اجازت دے دی۔
یہ بھی پڑھیں: کاٹلنگ واقعے کی تفصیلی انکوائری کی جائے گی، علی امین گنڈاپور
میڈیا رپورٹس کے مطابق بدھ کو عمران خان سے اڈیالہ جیل میں وزیراعلیٰ علی امین گنڈاپور اور بیرسٹرسیف نے ملاقات کی۔ اس دوران علی امین گنڈاپور اور بیرسٹر سیف نے عمران خان کو اسٹیبلشمنٹ سے مذاکرات کے لیے رضامند کرنے کی کوشش کی جس پر عمران خان نے نیم رضامندی ظاہر کی تاہم انہوں نے دونوں کو اسٹیبلشمنٹ سے بات کرنے کی اجازت دے دی۔
علی امین گنڈاپور اور بیرسٹرسیف کی بانی پی ٹی آئی سے ملاقات ڈھائی گھنٹے جاری رہی جس میں سیاسی صورتحال اور پارٹی امورپر بھی گفتگو ہوئی۔
رپورٹس کے مطابق علی امین گنڈاپور نے پی ٹی آئی کے سوشل میڈیا کی جارحانہ پالیسی کی جانب بھی بانی چیئرمین کی توجہ دلائی۔
یاد رہے کہ علی امین گنڈا پور کی ڈیڑھ ماہ سے زائد عرصے کے بعد بانی پی ٹی آئی سے ملاقات ہوئی ہے۔ اس حوالے سے اطلاعات یہ تھیں کہ خود عمران خان کچھ وجوہات کے سبب ان سے ملنا نہیں چاہ رہے تھے۔
مزید پڑھیے: شیر افضل مروت پی ٹی آئی میں واپس آنے کے لیے تیار، شرط بھی بتادی
دوسری جانب اڈیالا جیل کے اطراف سیکیورٹی سخت اور اضافی نفری بھی تعینات ہے۔ گزشتہ روز بھی پی ٹی آئی کے کچھ رہنماؤں نے عمران خان سے جیل میں ملاقات کی تھی۔
