صدر مملکت آصف زرداری کی طبیعت میں بہتری، ڈاکٹر عاصم کا قیاس آرائیوں سے گریز کا مشورہ

صدر مملکت کے معالج ڈاکٹر عاصم حسین نے کہا ہے کہ آصف زرداری کی طبیعت بتدریج بہتر ہو رہی ہے، قیاس آرائیوں سے گریز کیا جائے۔

میڈیا سے گفتگو کرتے ہوئے صدر مملکت کے معالج ڈاکٹر عاصم کا کہنا ہے کہ صدر زرداری سے ملاقاتوں پر پابندی برقرار ہے، جبکہ ان کے اہل خانہ کو مکمل آگاہی فراہم کی جا رہی ہے۔

یہ بھی پڑھیں:وزیر اعظم شہبازشریف کا صدر زرداری کو فون، جلد صحتیابی کی دعا

انہوں نے کہاکہ آصف زرداری کی صحت سے بھارتی میڈیا پر من گھڑت خبریں چلائی جارہی ہیں، صدر مملکت کی صحت سے متعلق پریشان کی کوئی بات نہیں۔

ڈاکٹر عاصم نے کہاکہ صدر مملکت کا علاج سینیئر ڈاکٹروں کی ایک ٹیم کررہی ہے، جس کے بعد ان کی طبیعت میں بتدریج بہتری آرہی ہے، اور کل یا پرسوں تک انہیں اسپتال سے ڈسچارج کردیا جائے گا۔

انہوں نے کہاکہ عوام صدر مملکت کی صحت سے متعلق صرف مصدقہ اطلاعات پر ہی انحصار کریں۔

ان کا مزید کہنا تھا کہ کورونا وائرس اب بھی پاکستان میں موجود ہے، تاہم اینٹی وائرس ادویات آنے کی وجہ سے صورت حال قابو میں ہے، صدر مملکت کی سوشل میڈیا پر زیرگردش فوٹیجز جعلی اور غیر مناسب ہیں۔

انہوں نے کہاکہ بھارت ہمارا دشمن ملک ہے، اور یہی وجہ ہے کہ وہاں سے ہمارے خلاف پروپیگنڈا کیا جارہا ہے، سیاسی مخالفین کچھ بھی کرلیں حقیقت کو جھٹلایا نہیں جا سکتا۔

ایک سوال کے جواب میں ان کا کہنا تھا کہ اسپتال سے صدر کی فوٹیج جاری کرنا یا نہ کرنا ایک سیاسی فیصلہ ہے، جس پر حکومت یا ایوان صدر غور کر سکتا ہے۔

واضح رہے کہ صدر پاکستان آصف علی زرداری کورونا کا شکار ہونے کی وجہ سے کراچی کے نجی اسپتال میں زیر علاج ہیں۔

گزشتہ روز وزیراعظم پاکستان شہبازشریف نے فون پر صدر مملکت کی خیریت دریافت کی تھی، اور ان کی صحت سے متعلق دریافت کیا۔ وزیراعظم نے صدر آصف علی زرداری کے لیے نیک خواہشات کا اظہار کیا۔

یہ بھی پڑھیں:صدر مملکت آصف زرداری کورونا کا شکار، قرنطینہ کردیے گئے، ملاقاتوں پر پابندی

وزیراعظم نے صدر آصف علی زرداری کی جلد صحت یابی کے لیے دعا کی۔ وزیراعظم نے کہا کہ اللہ تعالیٰ آپ کو جلد از جلد صحت یاب کرے۔ پوری قوم آپ کی صحت کے لیے دعاگو ہے۔

اسحاق ڈار کا بلاول بھٹو کو فون

نائب وزیراعظم و وزیرخارجہ سینیٹر محمد اسحاق ڈار نے چیئرمین پاکستان پیپلز پارٹی بلاول بھٹو سے بذریعہ ٹیلیفون گفتگو کی اور صدر مملکت کی خیریت دریافت کی۔

اسحاق ڈار نے بلاول بھٹو سے اُن کے والد صدر آصف علی زرداری کی طبیعت سے متعلق دریافت کیا۔ نائب وزیراعظم  نے صدر آصف علی زرداری کی جلد صحت یابی کے لیے دعا کی اور اُن کے لیے گلدستہ بھی بجھوایا۔