سیکیورٹی فورسز نے لکی مروت میں دہشت گردوں کے 3 حملے پسپا کردیے۔ اس دوران فائرنگ کے تبادلے میں 7 دہشت گرد ہلاک اور نائب صوبیدار سمیت 3 جوان شہید ہوگئے۔
آئی ایس پی آر کے مطابق لکی مروت میں سیکیورٹی فورسز کی چوکی کے قریب موٹرسائیکل سوار خودکش بمبار نے خود کو دھماکے سے اڑا لیا جس کے بعد سیکیورٹی فورسز اور دہشت گردوں کے درمیان شدید فائرنگ کا تبادلہ ہوا۔
آئی ایس پی آر نے بتایا کہ سیکیورٹی فورسز نے دہشت گردوں سے موثر انداز میں مقابلہ کیا جس کے نتیجے میں 4 دہشت گرد ہلاک ہو گئے۔
ضلع لکی مروت کے علاقے امیرکلام اور تاجبی خیل میں دہشت گردوں کے ساتھ 2 دیگر مقابلوں میں دہشت گرد کمانڈر موسیٰ خان سمیت 3 مزید دہشت گرد مارے گئے۔ ہلاک ہونے والے 7 دہشت گردوں سے اسلحہ اور گولہ بارود بھی برآمد ہوا ہے۔
دہشت گردوں کے ساتھ شدید فائرنگ کے تبادلے کے دوران نائب صوبیدار تاج میر، حوالدار ذاکر احمد اور سپاہی عابد حسین شہید ہو گئے۔
ڈی جی آئی ایس پی آر نے بتایا کہ سیکیورٹی فورسز دہشت گردی کی لعنت کو ختم کرنے کے لیے پرعزم ہیں اور ہمارے بہادر سپاہیوں کی ایسی قربانیاں ہمارے عزم کو مزید مضبوط کرتی ہیں۔
