وزیراعظم پاکستان کے مشیر برائے سیاسی امور رانا ثنااللہ نے کہا ہے کہ ہم نہیں چاہتے 26 نومبر جیسے واقعات دوبارہ ہوں، اگر پی ٹی آئی حدود کراس کرے گی تو گرفتاریاں ہوں گی۔
نجی ٹی وی سے گفتگو کرتے ہوئے انہوں نے کہاکہ عمران خان آج بھی مخالف سیاسی جماعتوں کے ساتھ بیٹھنے کے لیے تیار نہیں، لیکن سیاسی مسائل کا حل اسی وقت نکلے گا جب سب لوگ ساتھ بیٹھیں گے۔
یہ بھی پڑھیں حکومت کا پی ٹی آئی سے مذاکرات کے لیے پہل نہ کرنے کا اعلان
رانا ثنااللہ نے کہاکہ ہم 2011 سے اب تک مذاکرات کے لیے تیار ہیں، سیاسی جماعتیں مسائل پر بات کرنے کے لیے ساتھ بیٹھ جائیں تو اسٹیبلشمنٹ کی طرف سے نہیں روکا جائےگا۔
انہوں نے کہاکہ موجودہ اسٹیبلشمنٹ کا کوئی ذاتی ایجنڈا نہیں، اگر ایسا ہوتا تو ’وہ‘ آپ کو 24 میں سے 22 گھنٹے ٹی وی پر نظر آتے، جنرل مشرف کا اپنا سیاسی ایجنڈا تھا۔
ایک سوال کے جواب میں مشیر وزیراعظم نے کہاکہ اوورسیز پاکستانی کسی سے ملنا چاہیں تو کوئی منع نہیں کر سکتا، باہر سے آنے والے وفد کی عمران خان سے ملاقات ہوئی ہوگی، اور ذمہ دار لوگوں کو ضرور اس کا علم بھی ہوگا۔
انہوں نے کہاکہ پی ٹی آئی نے 9 مئی کیا اس لیے معاملہ بگڑا، حالانکہ اس سے قبل تو مسلم لیگ ن اور پیپلزپارٹی کی آپس میں لڑائی تھی۔
رانا ثنااللہ نے کہاکہ وزیراعظم نے قومی اسمبلی میں اپوزیشن کی نشستوں پر جاکر بات چیت کی آفر کی، لیکن اس پیشکش کا جو جواب دیا گیا وہ سب کو معلوم ہے۔
انہوں نے کہاکہ پی ٹی آئی کے لیے راستہ بات چیت سے ہی نکل سکتا ہے، جب تک سب لوگ ایک ٹیبل پر نہیں بیٹھیں گے معاملات حل نہیں ہوں گے۔
یہ بھی پڑھیں حکومت نے ایک بار پھر پی ٹی آئی کو مذاکرات کی دعوت دے دی
رانا ثنااللہ نے مزید کہاکہ پی ٹی آئی پارلیمنٹ میں بیٹھے اور جمہوری طریقہ اپنائے کوئی نہیں روکے گا۔
