وی نیوز ایکسکلیسیو میں میجر جنرل ریٹائرڈ طارق رشید نے بات کرتے ہوئے کہا کہ جموں کشمیر میں معصوم شہریوں کے قتل پر اظہارِ افسوس کرتے ہیں۔
انہوں نے کہا کہ انڈیا نے ہمیشہ کی طرح اس بار بھی ناکام بیانیہ بنانے کی کوشش کی۔ انڈیا نے ابھی تک کوئی ثبوت پیش نہیں کیا، نہ اسپتال میں کوئی زخمی دکھا سکا اور نہ ہی لاشوں کی تفیصلات سامنے آئیں۔ انہوں نے کہا کہ واقعے کے کچھ ہی دیر بعد انڈین میڈیا نے پروپیگنڈا شروع کردیا۔
جنرل (ر) طارق رشید نے کہا کہ بلوچستان جعفر ایکسپریس کے دہشتگردوں کے پاس اسلحہ ہمیں ملا تو پاکستان نے تمام ثبوت دنیا کے سامنے رکھے۔ اسی طرح کلبھوشن یادیو کو جب پکڑا گیا تو اس نے خود میڈیا پہ آ کر بھارتی جاسوس ہونے کا اعتراف کیا۔
انہوں نے کہا چونکہ انڈیا میں پہلے سے آزادی کی تحریکیں چل رہی ہیں، جبکہ کشمیری بھی انڈیا سے جان خلاصی چاہتا ہے، اب ایسے میں انڈیا بوکھلاہٹ کا شکار ہے، تبھی انڈیا والے ایسے اوچھے ہتکھنڈے استعمال کر رہے ہیں۔
جنرل (ر) طارق رشید نے کہا کہ انڈیا پوری دنیا میں دہشتگردی کے حوالے سے جانا جاتا ہے، قطر، یمن، بنگلہ دیش، کینیڈا اور باقی دنیا انڈیا کے حوالے سے تشویش کا اظہار کرتی ہے۔
ان کا کہنا تھا کہ سمجھوتا ایکسپریس واقعہ، پلوامہ اور حالیہ کشمیر واقعہ انڈیا کو بے نقاب کرنے کے لیے کافی ہے، یہ فالس فلیگ آپریشن ہے۔
جنرل (ر) طارق رشید نے کہا کہ اگر انڈیا نے کوئی ناکام جنگی جارحیت کی تو پاکستان منہ توڑ جواب دے گا۔ پاکستان نے ماضی میں بھی سخت جواب دیا، انڈیا نے 5 ایٹمی دھماکے کیے تو پاکستان نے 8 دھماکے کر کے دنیا میں اپنا لوہا منوایا۔
