پاکستان اور بھارت کے درمیان کشیدہ صورت حال کے پیش نظر پنجاب میں آج تعلیمی ادارے بند رکھنے کا اعلان کردیا گیا، جبکہ صوبے میں ہنگامی حالت نافذ کردی گئی۔
وزیراعلیٰ پنجاب مریم نواز نے اعلان کیا ہے کہ آج صوبہ پنجاب میں تمام تعلیمی ادارے بند رہیں گے۔
مریم نواز نے اپنے بیان میں کہاکہ پاکستان کے ایک ایک انچ کی حفاظت ہمارے ایمان اور میرے حلف کا حصہ ہے۔
انہوں نے کہاکہ پنجاب کی سرزمین غازیوں اور شہدا کی امین ہے اور اس سرزمین پر آج رات بہنے والا معصوموں کا خون ہم پر قرض ہے، پوری قوم پاکستان پر مسلط کی گئی اس جنگ میں پاک فوج کےساتھ کھڑی ہے۔
ان کا کہنا تھا کہ انتظامیہ کو فوری طور پر ایمرجنسی رسپانس کے احکامات جاری کر دیے گئے ہیں، کامیابی انشااللہ ہمارا مقدر ہوگی۔
واضح رہے کہ بھارت کی جانب سے پاکستان پر میزائل حملوں کے جواب میں پاکستان نے بھرپور جوابی کارروائی کرتے ہوئے دشمن کے 5 جنگی جہاز مار گرائے ہیں، جبکہ بریگیڈ ہیڈکوارٹر بھی تباہ کردیا گیا ہے۔
پاک بھارت کشیدہ صورت حال پر اقوام متحدہ کے سیکریٹری جنرل نے تشویش کا اظہار کرتے ہوئے دونوں ممالک کو تحمل سے کام لینے کا مشورہ دیا ہے۔
دوسری جانب وزیراعظم پاکستان شہباز شریف نے قومی سلامتی کمیٹی کا ہنگامی اجلاس صبح 10 بجے طلب کرلیا ہے۔
