گزشتہ رات کے حملے میں پاکستانی ایئر فورس کے ہاتھوں بھارت کے فرانسیسی ساختہ 4.5 ویں جنریشن کے ڈیسالٹ رافیل لڑاکا طیارے کو مار گرانے کی خبر کے بعد شینزین اسٹاک ایکسچینج میں چینگڈو ایئر کرافٹ کارپوریشن کے شیئرز میں 11.85 پوائنٹس کا اضافہ ریکارڈ کیا گیا ہے۔
چینگڈو ایئر کرافٹ کارپوریشن ایک چینی ایرو اسپیس گروپ ہے، جو جنگی طیاروں کو ڈیزائن اور تیار کرتا ہے، یہ پاک فضائیہ کے لیے جے 10 اور جے ایف 17 لڑاکا طیارے بناتا ہے۔
یہ بھی پڑھیں: پاک بھارت کشیدگی، پاکستان اسٹاک ایکسچینج لڑکھڑا کر سنبھل گئی
بدھ کو پاکستانی وقت کے مطابق صبح 9:45 بجے، شینزین اسٹاک ایکسچینج چین میں کمپنی کے شیئرزسی این وائی 11.9 یعنی 18 فیصد بڑھ کر سی این وائی 71.08 پر رہے۔
چینگڈو ایئر کرافٹ کارپوریشن کے شیئرز پونے بارہ بجے تک بھی سبز رنگ میں رہے اور سی این وائی 10.19 یعنی 17.17 فیصد بڑھ کر سی این وائی 69.42 پر ٹریڈ کر رہے تھے، لگ بھگ 6 منٹ بعد یہ شیئرز 16.29 فیصد یعنی سی این وائی 9.65 کے اضافے سے سی این وائی 68.88 پر ٹریڈ کر رہے تھے۔
مزید پڑھیں: بھارتی رافیل کی رینج 150 جبکہ پاکستانی جے10 سی کی 200 کلومیٹر ہے، ایئر کموڈور ریٹائرڈ خالد چشتی
دوسری جانب فرانس کی ڈیسالٹ ایوی ایشن کے شیئرز تقریباً 5 فیصد سے زائد تیزی سے گر گئے، پاکستان ایئر فورس کی جانب سے 5 رافیل جنگی طیاروں کو مار گرانے کی خبر نے پیرس اسٹاک ایکسچینج میں ڈیسالٹ ایوی ایشن کی مضبوط قدر کو خاصا دھچکا پہنچایا۔
پاکستانی وقت کے مطابق صبح 11:53 بجے، ڈیسالٹ ایوی ایشن 5.40 یورو یعنی 1.64 فیصد کم ہو کر 324 یورو پر تھا، بھارت کی جانب سے پاکستانی علاقوں پر میزائل حملوں کے بعد وزیر دفاع خواجہ آصف نے پاکستان ایئر فورس کی جانب سے 5 بھارتی لڑاکا طیارے مار گرائے جانے کی تصدیق کی تھی۔
