وزیر دفاع خواجہ آصف نے کہا ہے کہ بھارت میں مودی کیخلاف پارلیمان کے اندر اور باہر تنقید ہورہی ہے۔
ان کا کہنا تھا کہ مودی نے کل قوم سے اپنے خطاب میں معاملہ سمیٹنے کی کوشش کی لیکن معاملہ جتنا بکھر گیا ہے اسے سمیٹا نہیں جاسکتا۔
وزیر دفاع نے پیشگوئی کی کہ مودی کے دن گنے جاچکے ہیں اور اس کا فیصلہ بھارت کے عوام کریں گے۔
یہ بھی پڑھیے: کیا نریندر مودی نے ایک ہارے ہوئے وزیراعظم کی طرح تقریر کی؟
خواجہ آصف کا کہنا تھا کہ بھارت کے ساتھ گفتگو میں 3 معاملات پر بات ہوگی، دہشت گردی ایجنڈے کا حصہ ہے جس کا فیصلہ دنیا اب خود کرے گی کیوں کہ وزیر اعظم نے خود پیشکش کی تھی کہ دہشتگردی کی تحقیقات کی جائیں۔
وزیر دفاع خواجہ آصف
مودی پر پارلیمبت کے اندر اور باہر تنیقید کا سیلاب آیا ہوا ہے
مودی نے انے خطاب مین چیزوں کو سمیٹنے کی کوشش کی ہے
چیزیں اتنی بکھر چکی ہیں کہ مودی سمیت نہیں سکے گا۔۔
مودی کے دن گن جاچکے ہیں فیصلہ عوام کرے گی
کشمیراور دھشتگردی پر بات ہوگی
ملاقات کے… pic.twitter.com/kouf8BQCon
— Zahid Farooq Malik (@zfmalik) May 13, 2025
وزیر دفاع کا کہنا تھا کہ دہشت گردی میں سب سے زیادہ نقصان پاکستان نے اٹھایا ہے، پاکستان کی دہشت گردی کیخلاف جنگ کو تسلیم کیا جائے، ہم خود دہشت گردی کا 25 سال سے شکار ہیں اس کا الزام بھی ہمارے اوپر لگایا جارہا ہے۔
یہ بھی پڑھیے: پاکستان سے صرف دہشتگردی اور آزاد کشمیر پر بات ہو سکتی ہے، نریندر مودی
انہوں نے کہا کہ مذاکرات کے ایجنڈے میں شامل دوسرا معاملہ کشمیر کا ہے جس پر بات ہونی چاہیے۔
سندھ طاس معاہدے کی معطلی کے بارے میں وزیر دفاع نے کہا کہ پانی کے معاملے کو متنازع بنانے کی کوشش کی گئی، معاہدے کو شقوں کے مطابق دیکھنا چاہیے۔ اسے ایک فریق یکطرفہ طور پر ختم نہیں کرسکتا۔
خواجہ آصف نے بھارت کو بین الاقوامی دہشت گرد قرار دیتے ہوئے کہا کہ بھارت خود کئی سال سے دہشت گردی کرا رہا ہے۔ ہم گزشتہ 25 سے بھارت کے خلاف مشرقی اور مغربی محاز پر لڑ رہے ہیں بھارت کے دہشت گردی کے ثبوت کینیڈا اور امریکہ میں بھی موجود ہیں، ثبوت مذاکرات میں سامنے آنے چاہئیں۔
