پاکستان سپر لیگ (پی ایس ایل) 10 کا دوبارہ آغاز راولپنڈی کرکٹ سٹیڈیم میں 9 دن کے وقفے کے بعد ہونے جا رہا ہے۔
پاک بھارت کشیدگی کے دوران راولپنڈی سٹیڈیم پر بھارتی ڈرون حملہ ہونے کے بعد پی ایس ایل 10 کے باقی میچز کو ابتدائی طور پر متحدہ عرب امارات منتقل کر دیا گیا تھا تاہم بعدازاں پی سی بی نے پی ایس ایل 10 کو معطل کرنے کا فیصلہ کیا۔
اب پی ایس ایل کا دوبارہ آغاز ایک شاندار افتتاحی تقریب کے ساتھ ہوگا جس میں پاکستان کے مسلح افواج کے لیے موسیقی کی سلامی دی جائے گی۔
یہ بھی پڑھیے: پی ایس ایل سیزن 10، اب تک کن غیرملکی کھلاڑیوں نے دوبارہ شرکت کی ہامی بھرلی؟
تفصیلات کے مطابق میچ سے قبل میدان میں لائیو پرفارمنسز میں ساحر علی بگہ اور عذر شاہ اپنی آواز کا جادو جگائیں گے جبکہ اس کے علاوہ مڈ اننگز شو اور آتشبازی کا مظاہرہ بھی ہوگا۔
پاکستان کرکٹ بورڈ (پی سی بی) نے ایک بیان میں کل کے میچز کا شیڈول جاری کیا ہے۔
پی سی بی کے مطابق ایچ بی ایل پاکستان سپر لیگ ایکس کا دوبارہ آغاز ہفتہ 17 مئی کو ہوگا، جس میں بابر اعظم کی قیادت میں پشاور زلمی کراچی کنگز کے خلاف راولپنڈی کرکٹ سٹیڈیم میں میدان میں اتریں گے۔
