بھارتی حکومت نے ملک کے تمام 62 کنٹونمنٹ بورڈز کو تحلیل کرنے کا فیصلہ کرتے ہوئے ’قدیم نوآبادیاتی وراثت‘ کا خاتمہ کردیا ہے۔
مرکزی حکومت کے اس فیصلہ کے تحت چھاؤنیوں کی حدود میں شہری علاقوں کو میونسپل اداروں کے حوالہ کردیا جائے گا۔
مرکزی حکومت نے کہا ہے کہ 62 چھاؤنیوں کی حدود میں کنٹونمنٹ بورڈ کے زیر انتظام شہری علاقوں کو اب میونسپل اداروں کے حوالے کر تے ہوئے فوج کے مختص علاقوں کو ملٹری اسٹیشنز میں تبدیل کردیا جائے گا۔
ہماچل پردیش کے کانگڑا ضلع میں اپنی چھاؤنی کی حیثیت کو ختم کرنے والا پہلا قصبہ یول ہے۔ وزارت دفاع کی جانب سے 27 اپریل کو کنٹونمنٹ کی حیثیت تبدیل کرنے کا نوٹیفکیشن جاری کیا گیا تھا۔
بھارتی میڈیا کے مطابق ملک میں کنٹونمنٹ کی حیثیت میں مرحلہ وار تبدیلی کا اگلا پڑاؤ راجھستان کے ناصرآباد کنٹونمنٹ میں متوقع ہے۔ ’تبدیلی کا یہ عمل ان کنٹونمنٹ علاقوں میں زیادہ سرعت کے ساتھ متوقع ہے جہاں عسکری اور شہری حدود واضح ہیں۔ باقی جگہ اس کے لیے وقت درکار ہوگا۔‘
شہریوں کو کیا فائدہ ہوگا؟
بھارتی حکومت کے اس اہم قدم کو تمام اسٹیک ہولڈرز کے لیے فائدہ مند گردانا جارہا ہے۔ وہ شہری، جو اب تک میونسپل کارپوریشن کے ذریعہ ریاستی حکومت کی فلاحی اسکیموں تک رسائی حاصل نہیں کر رہے تھے، اب ان سے فائدہ اٹھا سکیں گے۔
دوسری جانب جہاں تک فوج کا تعلق ہے، وہ بھی اب فوجی اسٹیشن کی ترقی پر توجہ دے سکتی ہے۔ آزادی کے وقت بھارت میں 56 چھاؤنیاں تھیں جب کہ 1947 کے بعد 6 مزید تشکیل دی گئی تھیں۔ آخری چھاؤنی 1962 میں اجمیر میں تخلیق کی گئی تھی۔
چھاؤنیوں کے شہری رہائشیوں کو عام طور پر متعلقہ ریاستی حکومتوں کی فلاحی اسکیموں کے فوائد نہیں ملتے ہیں کیونکہ فوجی سہولیات کنٹونمنٹ بورڈز کے ذریعے وزارت دفاع کے ڈیفنس اسٹیٹ ڈیپارٹمنٹ کے ذریعے چلتی ہیں۔
عام شہریوں اور فیڈریشن میں شامل دیگر ریاستی حکومتوں کی جانب سے بھی چھاؤنیوں کے خاتمہ کا مطالبہ کیا گیا ہے۔ اب تک دفاعی بجٹ کا ایک بڑا حصہ چھاؤنیوں کے سول علاقوں کی ترقی پر بھی خرچ کیا جاتا رہا ہے۔
دفاعی اہلکاروں کے مطابق چھاؤنیوں کے شہری علاقوں کی مسلسل بڑھتی ہوئی توسیع کی وجہ سے ان سہولیات میں بیش قیمت دفاعی زمینوں پر دباؤ ہے۔ ’چھاؤنیاں نوآبادیاتی ڈھانچے ہیں اور ایسے اقدامات کر کے فوجی اسٹیشنوں کا بہتر انتظام کیا جا سکتا ہے۔
