بہت زیادہ سن اسکرین کے استعمال کی وجہ سے وٹامن ڈی کی شدید کمی کی شکار ایک چینی خاتون کو ہڈیوں کے فریکچر کا سامنا کرنا پڑ گیا۔
یہ بھی پڑھیں: خواتین سخت گرمی میں چہرے کی جلد کو صحت مند کیسے رکھ سکتی ہیں؟
چین کے شہر چینگدو میں ایک اسپتال کے ڈاکٹروں نے حال ہی میں ایک 48 سالہ مقامی خاتون کے غیر معمولی کیس کی اطلاع دی ہے جسے بظاہر صرف اتفاقیہ طور پر بستر پر کروٹ بدلنے سے ہڈیوں کے ٹوٹنے کا سامنا کرنا پڑگیا۔
ڈاکٹر لانگ شوانگ کے مطابق اسپتال میں کیے گئے ٹیسٹوں سے معلوم ہوا کہ نامعلوم خاتون کے وٹامن ڈی کی سطح انتہائی کم تھی جس سے ہڈیوں کے ٹوٹنے میں تیزی آئی اور شدید آسٹوپوروسس شروع ہو گیا۔
مزید تفتیش سے یہ بات سامنے آئی کہ مریضہ بچپن سے ہی سورج کی روشنی سے گریز کرتی تھیں اور شاذ و نادر ہی چھوٹی بازو والی شرٹ پہن کر گھر سے نکلتی تھیں۔ وہ باہر جاتے وقت ہمیشہ سن اسکرین لگاتی تھیں۔
مزید پڑھیے: چہرے کی جلد صحت مند کیسے؟ لیڈی ڈیانا کی بہو نے سارے راز کھول دیے
خاتون کا کیس دوسرے سن اسکرین کے شوقین افراد کے لیے ایک انتباہ کے طور پر پیش کیا گیا ہے جو اس کا زیادہ استعمال کر رہی ہوں اوراپنی ہڈیوں کی صحت متاثر کر رہی ہوں۔
گوانگ ژو میڈیکل یونیورسٹی کے دوسرے منسلک اسپتال کے آرتھوپیڈک اسپائن سرجری کے شعبے کے ڈائریکٹر جیانگ ژاؤ بنگ نے کہا کہ اکثر لوگ خود کو سورج سے بچانے کے لیے اپنے پورے جسم کو سر سے پاؤں تک ڈھانپتے ہیں۔ انہوں نے کہا کہ یہ واقعی غیر صحت بخش عمل ہے۔
جیانگ ژاؤ بنگ نے بتایا کہ ہمارے جسم میں تمام ہڈیوں کی ہر 10 سال بعد تجدید ہوتی ہے لیکن 30 سال کی عمر سے ہر سال 0.5 سے ایک فیصد کی شرح سے ہماری ہڈیوں کا وزن کم ہونا شروع ہوجاتا ہے۔
مزید پڑھیں: 3 ہزار سال قبل یورپی باشندوں کی رنگت کیسی ہوتی تھی؟
ان کا کہنا تھا کہ کیلشیم کی کم مقدار سورج کی روشنی میں کمی، اور وٹامن ڈی کی کمی یہ سب کیلشیم کے جذب میں رکاوٹ ہیں۔
اگرچہ عام طور پر سن اسکرین اور سورج سے بچاؤ کے اپنے فوائد ہیں جن سے جلد کے کینسر اور صحت کے دیگر سنگین مسائل کے خطرات کم ہوتے ہیں لیکن کچھ لوگ اس معاملے میں زیادتی کربیٹھتے ہیں اور اس طرح خود کو دیگر مسائل کا شکار بنا لیتے ہیں۔
سورج کی روشنی جسم کو وٹامن ڈی کے حوالے سے مدد دینے میں بہت اہم ہے، جو کہ ہڈیوں کی صحت اور کیلشیم کے جذب کے لیے ضروری ہے، اس لیے طویل عرصے تک سورج کی روشنی میں نہ رہنے سے قوت مدافعت اور ہڈیوں کی صحت خراب ہو سکتی ہے۔
یہ بھی پڑھیے: بدلتے موسم میں جلد کا خیال کیسے رکھا جائے؟
ڈاکٹر لونگ شوانگ کی طرف سے پیش کیا گیا کیس چینی سوشل میڈیا پر وائرل ہو گیا جس کی وجہ سے کچھ لوگوں نے یہ قیاس کیا کہ چینی خواتین کی سماجی اصولوں کے مطابق صاف جلد کی خواہش صحت کے سنگین مسائل کا باعث بن سکتی ہے۔
