شہر قائد سمیت ملک کے بیشتر علاقوں میں موسم شدید گرم ہے، جس کے باعث معمولات زندگی بھی متاثر ہو رہے ہیں، لیکن اس موسم میں سب سے بڑا مسلئہ یہ ہے کہ قربانی کے جانوروں کی خریداری کب کی جائے یا جو خریدے جا چکے انکی حفاظت کیسے کی جائے؟
یہ بھی پڑھیں:عید الاضحیٰ کے روز ملک بھر میں موسم کیسا ہو گا؟
ڈیری ایبڈ فارمنگ ایسوسی ایشن پاکستان کے صدر شاکر احمد گجر کا کہنا ہے کہ اس وقت ملک بھر میں موسم شدید گرم ہے اور ساتھ ہی عید الاضحی کی بھی آمد ہے، سنت ابراہیمی کی ادائیگی کے لیے شہری جانور خرید رہے ہیں لیکن اکثریت کے پاس جانوروں کے رکھنے کا مناسب انتظام بھی موجود نہیں۔
جانور کو ہوادار مقام پر رکھا جائے
شاکر احمد گجر کا کہنا ہے کہ اس بات کا خاص خیال رکھا جائے کہ جانور کو ہوادار مقام پر رکھا جائے۔
گائے کے حوالے سے انکا کہنا ہے کہ وہ ایک نازک جانور ہے اسے خاص توجہ کی ضرورت ہے، ان کا کہنا ہے کہ کراچی میں ہوا میں نمی کا تناسب بڑھ رہا ہے ایسی صورت میں پنکھے لگائیں جائیں اور وقتاً فوقتاً پانی کا چھڑکاؤ کیا جائے۔
منہ اور کھر کی بیماری
شاکر احمد گجر کا کہنا ہے کہ جانوروں کے منہ سے رال ٹپکنے اور کھر زخمی ہونے کی ایک شکایت موصول ہو رہی ہے، انکا کہنا ہے کہ اگر جانور کو یہ بیماریاں ہیں تو جانور کا منہ چیک کیا جائے، ساتھ ہی اسکو چلایا جائے۔ اگر اس کا منہ چھیلا ہوا نہیں یا زبان پر چھالے نہیں ہیں اور وہ چلنے میں بھی ٹھیک ہے تو جانور تندرست ہے ورنہ جانور بیمار ہے۔
انکا مزید کہنا تھا کہ گرمی اس وقت بڑھتی جا رہی ہے، ان کی معلومات کے مطابق 2 جون کے بعد اس میں بہتری کا امکان ہے، تو کوشش یہ کی جائے کہ 2 جون کے بعد ہی جانور خریدیں تا کہ ان کا خیال رکھنا آسان ہو اور جانور کو بیماری سے بچایا جا سکے، تاہم جو لوگ جانور خرید چکے وہ خاص احتیاط کریں۔
شدید گرمی کا خطرہ ٹل چکا
ماہر موسمیات جاوید میمن کا کہنا ہے کہ 3 جون تک کراچی میں موسم گرم رہے گا۔ انکا کہنا تھا کہ سائیکلون کے باعث جس شدید گرمی کا خطرہ تھا وہ ٹل چکا ہے۔ بحیرہ عرب میں ایسا کوئی سسٹم تاحال نظر آیا ہے کہ جس سے ہم یہ اندازہ لگا سکیں کہ آنے والے دنوں میں ہیٹ ویوو یا شدید گرمی پڑے گی۔
درجہ حرارت کہاں تک جا سکتا ہے؟
جاوید میمن کا کہنا تھا کہ 3 جون تک کراچی کا درجہ حرارت 41 ڈگری سینٹی گریٹ تک جا سکتا ہے اور کچھ علاقوں میں 42 ڈگری تک بھی جا سکتا ہے۔ اس وقت پاکستان میں مغربی ہواؤں کا سسٹم ایکٹوو ہے، اسے آفیشل ہیٹ ویوو تو نہیں کہا گیا۔ لیکن صورت حال ہیٹ ویو جیسے ہی رہے گی۔
