پاکستان بار کونسل اور سپریم کورٹ بار ایسوسی ایشن کے درمیان اختلافات کا معاملہ سپریم کورٹ پہنچ گیا.
سپریم کورٹ بار ایسوسی ایشن کے صدر اور سیکریٹری نے پاکستان بار کونسل کے خلاف سپریم کورٹ سے رجوع کیا ہے۔
صدر سپریم کورٹ بار عابد زبیری اور سیکریٹری مقتدر اختر شبیر نے پاکستان بار کونسل کے شوکاز نوٹس کے خلاف درخواست دائر کی ہے۔ یاد رہے کہ پاکستان بار کونسل نے ضابطہ اخلاق کی خلاف ورزی پر صدر سپریم کورٹ بار عابد زبیری اور سیکریٹری کو شوکاز نوٹس جاری کیا تھا
سپریم کورٹ بار ایسوسی ایشن نے اپنی درخواست میں استدعا کی ہے کہ عدالت پاکستان بار کا شوکاز نوٹس کالعدم قرار دے۔
سپریم کورٹ بار ایسوسی ایشن کا کہنا ہے کہ چوں کہ وفاقی وزیر قانون پاکستان بار کونسل کے ممبر ہیں اس لیے کونسل کا جھکاؤ حکومت کی جانب ہے۔
درخواست میں کہا گیا کہ پاکستان بار کونسل نے عابد زبیری اور دیگر کو شوکاز نوٹس سیاسی بنیادوں پر جاری کیا جو غیر قانونی، دائرہ اختیار سے متجاوز اور آئین کے آرٹیکل 9 کے خلاف ہے۔
سپریم کورٹ بار ایسوسی ایشن نے عدالت سے استدعا کی کہ پاکستان بار کونسل کو سپریم کورٹ بار کے معاملات میں دخل اندازی سے بھی روکا جائے۔
درخواست ایڈووکیٹ حامد خان کی وساطت سے دائر کی گئی جس میں پاکستان بار کونسل اور ایگزیکٹو کمیٹی کو فریق بنایا گیا ہے۔
