امریکی میڈیا نے دعویٰ کیا ہے کہ اسرائیل ایران پر کسی بھی وقت حملہ کرسکتا ہے، اور اس نے اس ممکنہ کارروائی کی پیشگی اطلاع امریکا کو دے دی ہے۔ رپورٹ کے مطابق اسرائیلی حکام نے امریکی حکام کو بتایا ہے کہ اسرائیل ایران میں ایک بڑے فوجی آپریشن کے لیے مکمل طور پر تیار ہے۔
امریکی ذرائع ابلاغ کا کہنا ہے کہ ایران، اسرائیلی حملے کی صورت میں جوابی کارروائی میں عراق میں واقع امریکی تنصیبات کو نشانہ بنا سکتا ہے۔ اسی خدشے کے تحت امریکا نے مشرقِ وسطیٰ میں موجود اپنے بعض شہریوں کو فوری علاقہ چھوڑنے کی ہدایت جاری کی ہے، جبکہ پینٹاگون نے فوجی اہلکاروں کے خاندانوں کو رضاکارانہ طور پر خطے سے انخلا کی اجازت دے دی ہے۔
امریکی وزیر دفاع نے گزشتہ روز مشرق وسطیٰ سے غیر سفارتی عملے کے رضا کارانہ انخلا کی منظوری بھی دے دی۔ ایک اعلیٰ امریکی عہدیدار نے بیان میں کہا کہ ہمارے فوجیوں اور ان کے اہلِ خانہ کی سلامتی اولین ترجیح ہے۔
مزید پڑھیں: امریکا میں احتجاج کا دائرہ بڑھ گیا، مظاہروں کو سختی سے کچلا جائیگا، صدر ٹرمپ
ادھر ایران نے بھی سخت ردعمل ظاہر کرتے ہوئے امریکا کو خبردار کیا ہے کہ اگر کسی قسم کا تنازع شروع ہوا تو ایران پورے خطے میں موجود امریکی فوجی اڈوں کو نشانہ بنائے گا۔ ایرانی وزیر دفاع کا کہنا تھا کہ ہم امید کرتے ہیں کہ صورتحال مذاکرات سے حل ہوگی، لیکن اگر ایران پر جنگ مسلط کی گئی تو دشمن کو ناقابلِ تلافی نقصان اٹھانا پڑے گا۔
دوسری جانب ایران اور امریکا کے درمیان جوہری معاہدے کی بحالی کے لیے سفارتی کوششیں جاری ہیں۔ دونوں ممالک اپریل سے اب تک 5 مذاکراتی دور مکمل کر چکے ہیں تاکہ 2015 کے جوہری معاہدے کی جگہ ایک نیا معاہدہ طے پا سکے۔ چھٹا مذاکراتی دور اتوار کو عمان کے دارالحکومت مسقط میں متوقع ہے۔
مبصرین کا کہنا ہے کہ اگر اسرائیل کی جانب سے ایران پر حملہ کیا گیا تو خطے میں ایک نئی جنگ کا آغاز ہو سکتا ہے، جس کے اثرات نہ صرف مشرق وسطیٰ بلکہ عالمی معیشت اور سیاسی استحکام پر بھی پڑ سکتے ہیں۔
