آئی سی سی ٹیسٹ چیمپیئن شپ 2023-25 کے فائنل کے دوسرے روز کے اختتام پر جنوبی افریقہ کے خلاف آسٹریلیا نے اپنی پوزیشن قدرے بہتر کرلی۔ دفاعی چیمپیئن کو دوسری اننگز میں 8 وکٹوں پر 144 اسکور کرنے کے بعد 218 رنز کی لیڈ حاصل ہوچکی ہے۔
یہ بھی پڑھیں: ورلڈ ٹیسٹ چیمپیئن شپ فائنل: آسٹریلیا کے 212 کے جواب میں جنوبی افریقہ کے 43 رنز پر 4 کھلاڑی آؤٹ
آسٹریلیا کی پہلی اننگز کے 212 رنز کے جواب میں جنوبی افریقہ کے بلے باز جم کر نہیں کھیل سکے تھے۔ پہلی مرتبہ چیمپیئن شپ جیتنے کا خواب لیے جنوبی افریقہ کی پوری ٹیم صرف 138 رنز کر آل آؤٹ ہوگئی تھی۔
ٹیسٹ چیمپیئن شپ فائنل کے دوسرے روز کھیل کے آغاز پر جنوبی افریقہ نے 4 وکٹوں کے نقصان پر جب دوبارہ بیٹنگ شروع کی تو ان کے بیٹرز پہلے روز کے مقابلے میں کافی پر اعتماد نظر آئے۔
کپتان ٹمبا باؤما اور ڈیوڈ بیڈنگھم کے درمیان 64 رنز کی مستحکم پارٹنر شپ کے بعد جنوبی افریقہ کو کچھ امید ضرور ملی تاہم 94 کے مجموعی اسکور پر جب کپتان ٹمبا باؤما 36 رنز بنا پیٹ کمنز کا شکار ہوئے تو اس کے بعد جنوبی افریقی بیٹرز کینگروز کے سامنے زیادہ دیر تک مزاحمت کرنے میں ناکام رہے اور پوری ٹیم صرف 138 رنز بنا کر پویلین واپس لوٹ گئی۔
آسٹریلیا کے کپتان پیٹ کمنز نے تباہ کن بولنگ کرتے ہوئے 28 رنز دے کر 6 وکٹیں حاصل کیں۔ مچل اسٹارک 2 اور جوش ہیزل ووڈ ایک وکٹ حاصل کرنے میں کامیاب رہے۔
مزید پڑھیے: ورلڈ ٹیسٹ چیمپیئن شپ فائنل: جانیے کل سے شروع ہونے والے شاہانہ مقابلے کی تفصیلات
بعد ازاں آسٹریلیا نے دوسرے کھیل کے اختتام تک اپنی دوسری اننگز میں 8 وکٹوں کے نقصان پر 144 رنز بنائے۔ ایلکس کیری 43 رنز کے ساتھ نمایاں رہے۔ جنوبی افریقہ کے بولر ربادا نے 3 وکٹوں کے ساتھ نمایاں رہے۔
اس طرح آسٹریلیا کو جنوبی افریقہ کے خلاف اب تک کل 218 رنز کی برتری حاصل ہوچکی ہے اور اس کی 2 وکٹیں ابھی باقی ہیں۔ اب دیکھنا یہ ہے کہ تیسرے روز جمعے کو آسٹریلیا کا دیا ہوا ٹارگٹ جنوبی افریقہ کے لیے سہل ثابت ہوتا ہے یا پہلی اننگز کی طرح ان کے بلے باز دفاعی چیمپیئن کے بولرز کے سامنے بے بس ہوجاتے ہیں۔
اس سے قبل میچ کے پہلے دن بدھ کو ٹمبا باؤما نے ٹاس جیت کر پہلے فیلڈنگ کرنے کا فیصلہ کیا تھا۔ جنوبی افریقہ کے بولرز نے صرف 212 کے مجموعے پر کینگروز کو ڈھیر کردیا تھا۔
مزید پڑھیں: ورلڈ ٹیسٹ چیمپیئن شپ فائنل کے لیے آسٹریلیا کے اسکواڈ کا اعلان، کن اہم کھلاڑیوں کی واپسی ہوئی؟
بیوویبسٹر اور سابق کپتان اسٹیون اسمتھ بالترتیب 72 اور 66 رنز کے ساتھ نمایاں رہے تھے۔ جنوبی افریقہ کے فاسٹ بولر کاگیسوراباڈا نے 51 رنز کے عوض 5 وکٹیں حاصل کی تھیں جبکہ مارکوجانسن نے 3، کیشومہارج اور ایڈن مارکرم نے ایک ایک کھلاڑی آؤٹ کیا۔
