پاکستان اور بلغاریہ کے درمیان سفارتی تعلقات کے 60 سال مکمل ہونے پر دونوں ممالک کے وزرائے خارجہ نے تہنیتی پیغامات کا تبادلہ کیا ہے، جب کہ دفتر خارجہ نے بلغاریہ کی قیادت اور عوام کو دلی مبارکباد پیش کی ہے۔
دفتر خارجہ کی جانب سے جاری بیان میں کہا گیا ہے کہ یہ تاریخی سنگ میل پاکستان اور بلغاریہ کے درمیان دہائیوں پر محیط خوشگوار، دوستانہ اور پائیدار تعلقات کا مظہر ہے۔
اس موقع پر وزیر خارجہ اسحاق ڈار اور بلغاریہ کے وزیر خارجہ جارج جارجیو نے خصوصی پیغامات کا تبادلہ کیا، جن میں دونوں ممالک کے درمیان باہمی تعلقات کی کامیابیوں کو سراہا گیا۔ دونوں رہنماؤں نے مختلف شعبوں میں دوطرفہ تعاون کو مزید فروغ دینے کے عزم کا اعادہ کیا۔
بیان میں مزید کہا گیا ہے کہ پاکستان اور بلغاریہ تجارت، تعلیم، ثقافت اور دیگر شعبوں میں تعاون کو وسعت دینے کے خواہاں ہیں، تاکہ دوطرفہ تعلقات کو مزید مضبوط بنایا جا سکے۔
