ان دنوں بھیڑ بکریوں اور مال بردار جانوروں کے ہمراہ چرواہوں نے مانسہرہ بھر میں ڈیرے ڈالے ہوئے ہیں۔ یہ چرواہے اپنے مویشیوں کو گرمیوں میں سرد جبکہ سردیوں میں گرم علاقوں کی جانب ہانک لے جاتے ہیں۔
ہری پور سے اپنے مویشیوں کے ہمراہ نکلے حسن داد کی منزل کاغان ہے۔ حسن داد کے مطابق وہ لگ بھگ ایک ماہ کے عرصہ میں پیدل ہری پور سے کاغان پہنچتے ہیں۔
’دن میں سفر کرنے والے چرواہے جہاں رات آجائے وہیں رک جاتے ہیں۔ بیمار یا کمزور جانور کو ذبح کرکے کھایا جاتا ہے جبکہ بکنے والے جانوروں کی مدد سے اشیاء ضرورت خریدی جاتی ہیں۔‘
چرواہوں کے مطابق سرد علاقوں میں جانور صحت مند رہتے ہیں اور برفباری شروع ہوتے ہی ان چرواہوں کا سفر دوبارہ گرم علاقوں کی طرف ہوتا ہے، جہاں موسم سرما کا نسبتاً معتدل موسم ان کے جانوروں کی نشوونما کے لیے معاون ہوتا ہے۔
