امریکی صدر ڈونلڈ ٹرمپ نے اعلان کیا ہے کہ وہ آئندہ ہفتے اسرائیلی وزیر اعظم بنیامین نیتن یاہو سے وائٹ ہاؤس میں ملاقات کریں گے، جس دوران غزہ اور ایران کی موجودہ صورتحال زیر بحث آئے گی۔
یہ بھی پڑھیں: ڈونلڈ ٹرمپ نیتن یاہو ملاقات اگلے پیر کو، غزہ جنگ بندی کے امکانات کتنے؟
غیر ملکی خبر رساں ادارے ’رائٹرز‘ کے مطابق صدر ٹرمپ نے غزہ میں جلد جنگ بندی کی امید ظاہر کرتے ہوئے کہاکہ وہ اسرائیلی وزیراعظم سے اس حوالے سے اہم اور نتیجہ خیز بات چیت کریں گے۔ ان کا کہنا تھا کہ نیتن یاہو بھی جنگ بندی کے خواہاں ہیں۔
فلوریڈا روانگی سے قبل صحافیوں سے گفتگو کرتے ہوئے صدر ٹرمپ نے کہاکہ انہیں امید ہے کہ آئندہ ہفتے اسرائیل اور حماس کے درمیان جنگ بندی اور یرغمالیوں کی واپسی سے متعلق کوئی معاہدہ طے پا سکتا ہے۔
یہ بھی پڑھیں: غزہ جنگ بندی: حماس نے امریکا کی تجویز پر اپنا جواب جمع کرا دیا
انہوں نے مزید کہاکہ ہم چاہتے ہیں کہ یرغمالیوں کی بحفاظت واپسی ممکن ہو، اور یہ معاملہ آئندہ ہفتے کسی بھی وقت حل ہو سکتا ہے۔
