پاکستانی اداکار ثاقب سمیر کا کہنا ہے کہ ایک بار ان کا جنات سے سامنا ہوا تو انہوں نے دل میں سورۃ الناس پڑھنا شروع کردی جس پر جن نے کہا ’پڑھنا بند کرو‘ تو ان کے رونگٹے کھڑے ہو گئے۔
حال ہی میں اداکار ثاقب سمیر نے تابش ہاشمی کے پروگرام میں شرکت کی جہاں نے اپنے ساتھ پیش آنے والا ایک واقعہ سنایا۔ انہوں نے بتایا کہ وہ کراچی میں جس بلڈنگ میں رہتے تھے اس کے سامنے والی بلڈنگ میں دو لڑکیاں رہتی تھیں جنہیں انہوں نے اداکاری کی ورکشاپ کرائی تھی۔
ایک لڑکی نے بتایا کہ ان میں سے ایک پر جن حاضر ہوتے ہیں۔ اس وقت اس میں بہت پاور آ جاتی ہے اور وہ خود کو نقصان پہنچانے کی کوشش کرتی ہے۔ اداکار نے کہا کہ ایک دن اس لڑکی پر جن حاضر ہونےو الا تھا تو اس نے مدد کے لیے مجھے بلایا جس پر میں نے کہا کہ ان کے گھر جانا مناسب نہیں اور میں نے دونوں کو اپنے گھر بلا لیا۔
اداکار نے بتایا کہ اس لڑکی پر جب جنات آئے تو اس کے بال اس کے چہرے پر آ گئے، وہ تیز تیز ہلنے لگی اور مرد کی آواز نکالنے لگی جس پر میں نے دل میں سورۃ الناس پڑھنی شروع کر دی اور وہ لڑکی ہلتے ہلتے رکی اور مجھے کہا ’مت پڑھ‘ جس پر میرے رونگٹے کھڑے ہو گئے۔
ثاقب سمیر نے بتایا کہ میں نے جن کو جواباً کہا کہ میں کیوں نہ پڑھوں جس پر اس جن نے کہا کہ ’ہم اس لڑکی کو واپس کوئٹہ لے کر جائیں گے اور اسے ماریں گے‘۔ میں نے کہا ہمارا آپ سے مقابلہ نہیں ہے آپ ہمیں دیکھ سکتے ہیں ہم آپ کو نہیں دیکھ سکتے۔ آپ کو کس نے لڑکی کے پیچھے لگایا ہے ہم ان سے بات کر لیتے ہیں جس پر انہوں نے جواب نہیں دیا۔
اداکار نے کہا کہ میں نے جن کو کہا کہ اس کو معاف کر دیں لیکن انہوں نے کہا کہ ہم اسے لے کر جائیں گے۔ اس کے کچھ دیر بعد لڑکی اپنے حواس میں واپس آئی اور جن چلا گیا تو میں نے لڑکی سے کہا کہ تم یہاں سے چلی جاؤ۔ انہوں نے کہا کہ دعا ہے وہ لڑکی جہاں بھی ہو خیریت سے ہو۔
