چین کا ملک میں تیار کردہ پہلا طیارہ بردار بحری جہاز ’شین ڈونگ‘ جمعرات کے روز ہانگ کانگ کی سمندری حدود میں داخل ہو گیا۔ بحری جہاز ایسٹ لما چینل سے گزرتا ہوا وکٹوریہ ہاربر کے مغربی لنگر انداز علاقے میں پہنچا جہاں اسے لنگر انداز کردیا گیا۔
یہ بھی پڑھیں: ٹریڈ وار: امریکی بندرگاہوں پر لنگرانداز چینی بحری جہازوں پر فیس عائد کرنے کا اعلان
تقریباً 315 میٹر لمبے اور 75 میٹر چوڑے اس جدید جنگی جہاز کا فلائٹ ڈیک 300 میٹر طویل ہے، اور یہ 60 ہزار ٹن وزنی ہے۔’شین ڈونگ‘ 44 طیارے لے جانے کی صلاحیت رکھتا ہے۔
جہاز کی آمد کے موقع پر مقامی شہریوں اور عسکری امور کے شوقین افراد کی بڑی تعداد نے ساحلی علاقوں میں جمع ہوکر اس منظر کو دیکھا۔
’شین ڈونگ‘ ایک بحری بیڑے کے ہمراہ ہانگ کانگ پہنچا ہے جس میں چینی ڈسٹرائر’ژان جیانگ‘ اور فریگیٹ ’یون چنگ‘ بھی شامل ہیں۔
یہ بھی پڑھیں: پاکستان اور چین کے درمیان مشترکہ بحری مشق ’سی گارڈین‘ کا آغاز
یہ طیارہ برداربحری بیڑا ہانگ کانگ میں 5 دن قیام کرے گا اور ہفتے کے آخر میں عوام کو طیارہ بردار جہاز کا دورہ کرنے کی اجازت دی جائے گی۔ بیڑا پیر، 7 جولائی کو بندرگاہ سے روانہ ہو گا۔
