بالی ووڈ اسٹار شيفالی جریوالا جنہیں ’کانٹا لگا گرل‘ کے نام سے جانا جاتا ہے، 27 جون کو انتقال کر گئیں اس وقت اُن کی عمر 42 برس تھی۔
وفات کے بعد شیفالی کے شوہر پراگ تیاگی نے فوٹو اینڈ ویڈیو شیئرنگ ایپ انسٹاگرام پر ان کے حوالے سے ایک جذباتی پیغام شیئر کیا اور شیفالی کو ’میری پری‘ کہہ کر مخاطب کیا۔ انہوں نے کہا کہ شیفالی ایسی آگ تھی جو وقار میں لپٹی ہوئی تھی۔ تیز، یکسو اور بے حد پُر عزم۔
یہ بھی پڑھیں: شیفالی جریوالا کی موت پر معروف مفتی طارق مسعود بھی چیخ اٹھے
ایک ایسی عورت جنہوں نے شعوری طور پر زندگی گزاری، اپنے کیریئر، ذہن، جسم اور روح کو طاقت اور عزم کے ساتھ پروان چڑھایا۔ لیکن ان تمام کامیابیوں سے بڑھ کر شيفالی محبت کا سب سے بے غرض روپ تھیں۔
پراگ تیاگی نے لکھا کہ وہ سب کی ماں تھیں۔ ہمیشہ دوسروں کو خود سے پہلے رکھتیں، جن کی خاموش موجودگی بھی سکون کا پیغام دیتی تھی۔ وہ ایک مہربان بیٹی، محبت سے لبریز اور وفادار شریکِ حیات اور سمبا کے لیے بے مثال ماں تھیں۔
View this post on Instagram
ان کا مزید کہنا تھا کہ وہ ایک ایسی بہن تھی جو ہمیشہ حفاظت اور پیار کے جذبے سے سرشار رہتی تھی۔ ایک ایسی دوست جو اپنے چاہنے والوں کے لیے وفاداری، ہمدردی اور حوصلے کے ساتھ چٹان کی مانند کھڑی رہتیں تھیں۔
پراگ تیاگی نے اپنے جذباتی پیغام میں لکھا کہ آج جب دکھ اور الجھن کا غبار چھایا ہوا ہے یہ یاد رکھنا ضروری ہے کہ شيفالی کو ان قیاس آرائیوں سے نہیں بلکہ اس روشنی سے یاد رکھا جائے جو وہ اپنے ساتھ لے کر آئی تھیں۔ وہ احساس جو اُن کے لمس سے پیدا ہوتا تھا، وہ خوشیاں جو اُن کی موجودگی سے پھیلتی تھیں اور وہ زندگیاں جو وہ بہتر کر گئیں۔
انہوں نے مزید کہا کہ میں اس تحریر کا آغاز اس دعا کے ساتھ کرنا چاہتا ہوں کہ یہ جگہ صرف محبت سے بھر جائے۔ ایسی یادوں سے جو زخموں پر مرہم رکھیں۔ ایسی باتوں سے جو اُن کی موجودگی کو ہمیشہ کے لیے زندہ رکھیں۔ ان کا کہنا تھا کہ یہی ان کی وراثت ہو ایک ایسی روشن روح، جو کبھی بھی فراموش نہیں کی جا سکتی۔ آخر میں ان کا کہنا تھا کہ میں ہمیشہ آپ سے محبت کرتا رہوں گا۔
یہ بھی پڑھیں: موت سے چند لمحے قبل شیفالی کی شوہر سے کیا گفتگو ہوئی؟
واضح رہے کہ ابتدائی پوسٹ مارٹم رپورٹ میں یہ بات سامنے آئی ہے کہ بلڈ پریشر میں اچانک کمی اور اس کے بعد دل کا دورہ پڑنے کی وجہ سے ان کا انتقال ہو سکتا ہے۔ شیفالی اپنے شوہر پراگ تیاگی کے ساتھ تھیں جس وقت ان کی طبیعت بگڑی اور انہیں فوری طور پر اسپتال لے جایا گیا جہاں ڈاکٹروں نے انہیں مردہ قرار دے دیا۔
ابتدائی رپورٹس کے مطابق شیفالی کو27 اور 28 جون کی درمیانی شب اچانک دل کا دورہ پڑا۔ حادثے کے دن شیفالی نے گھر میں ہونے والی پوجا کی وجہ سے روزہ رکھا تھا۔ کہا جاتا ہے کہ وہ اپنی پہلی غذا لیتے ہوئے بیہوش ہو کر گر گئی تھیں۔ شیفالی کے قریبی ذرائع کے مطابق اسی رات انہوں نے اینٹی ایجنگ انجیکشن بھی لیا تھا، تاہم اس انجیکشن کا اس واقعے میں کیا کردار تھا اس کی تحقیقات جاری ہیں۔
