سعودی عرب کے وزیر خارجہ شہزادہ فیصل بن فرحان برازیل کے شہر ریو ڈی جنیرو پہنچ گئے ہیں، جہاں وہ 17ویں برکس سربراہی اجلاس میں شرکت کریں گے۔
یہ بھی پڑھیں: برازیل میں برکس اجلاس: پہلگام حملے پر بھارت کو ایک اور سفارتی ناکامی
اگرچہ سعودی عرب تاحال اس بلاک کا مکمل رکن نہیں ہے، لیکن وہ ایک ایسے ملک کے طور پر اجلاس میں شرکت کررہا ہے جسے اس گروپ میں شمولیت کے لیے مدعو کیا گیا ہے۔
سعودی پریس ایجنسی کے مطابق شہزادہ فیصل ولی عہد شہزادہ محمد بن سلمان کی نمائندگی کرتے ہوئے اجلاس میں شریک ہورہے ہیں۔
رپورٹ میں بتایا گیا ہے کہ شہزادہ فیصل برکس سمٹ کے دوسرے دن کی نشست میں شرکت کریں گے، جس میں شراکت دار اور مہمان ممالک کے علاوہ وہ بین الاقوامی تنظیمیں بھی شریک ہوں گی جنہیں صدارت کی جانب سے دعوت دی گئی ہے۔
اجلاس میں عالمی ترقیاتی کوششوں پر تبادلہ خیال کیا جائےگا، جن میں ماحولیاتی تبدیلیوں سے نمٹنے اور وبائی امراض و بیماریوں کے خلاف جنگ شامل ہیں۔
یہ بھی پڑھیں: برازیل میں منعقدہ ‘برکس’ اجلاس میں ٹرمپ کی تجارتی پالیسیوں پر شدید تحفظات
برکس گروپ نے پہلی بار 2009 میں برازیل، روس، بھارت اور چین کے رہنماؤں کو یکجا کیا تھا۔ بعد ازاں اس بلاک میں جنوبی افریقہ کو شامل کیا گیا۔ پھر گزشتہ سال مصر، ایتھوپیا، انڈونیشیا، ایران اور متحدہ عرب امارات کو بھی اس کے رکن کے طور پر شامل کیا گیا۔
