وفاقی وزیر دفاع خواجہ آصف نے کہا ہے کہ سابق وزیرِاعظم نواز شریف کو نااہلی کی سزا سنانے والے ججوں کو پارلیمنٹ کے کٹہرے میں بلایا جائے گا۔
لندن میں مسلم لیگ (ن) کے قائد نواز شریف سے ملاقات کے بعد میڈیا سے گفتگو کرتے ہوئے خواجہ آصف کا کہنا تھا کہ ہم موجودہ بحران میں پارلیمنٹ کا بھرپور دفاع کریں گے۔
خواجہ آصف نے کہا کہ تمام آئینی اداروں کو اپنی حدود میں رہ کر کام کرنا چاہیے اور بحران کا بہترین حل بھی یہی ہے۔
اس سے قبل خواجہ آصف نے سابق وزیراعظم نواز شریف سے ملاقات کی جس میں ملک کی مجموعی صورتحال پر غور کیا گیا۔
واضح رہے کہ 28 جولائی 2017 کو سپریم کورٹ آف پاکستان نے نواز شریف کو پانامہ کیس میں نااہل کردیا تھا۔
مسلم لیگ ن کی قیادت اس وقت سے یہ موقف اختیار کرتی آرہی ہے کہ نواز شریف کو بیٹے سے تنخواہ نہ لینے پر نااہل کر کے انصاف کا خون کیا گیا جس کا نقصان ملک کو ہوا۔
