اسرائیلی فوج نے تصدیق کی ہے کہ غزہ پٹی کے شمالی حصے میں ہونے والی جھڑپوں کے دوران 3 اسرائیلی فوجی ہلاک ہو گئے ہیں، جب کہ ایک افسر شدید زخمی ہو گیا ہے۔ اسرائیل فوج کے بیان کے مطابق، یہ فوجی 401 ویں آرمڈ بریگیڈ کے 52 ویں بٹالین سے تعلق رکھتے تھے۔
اسرائیلی فوج کے مطابق، فوجی ایک ٹینک میں سوار تھے جسے ممکنہ طور پر اینٹی ٹینک میزائل سے نشانہ بنایا گیا۔ تاہم، دھماکے کی دیگر وجوہات کا بھی جائزہ لیا جا رہا ہے۔
فوج نے ہلاک ہونے والے فوجیوں کی شناخت طاہر کردی ہے۔ان میں اسٹاف سارجنٹ شوہم میناہم (21 سال)، سارجنٹ شلومو یاكير شرم (20 سال) اور سارجنٹ یولی فیکٹر (19 سال) شامل ہیں۔ شدید زخمی ہونے والے افسر کی شناخت ظاہر نہیں کی گئی، اسے فوری طور پر اسپتال میں داخل کرا دیا گیا۔
یہ واقعہ غزہ کے شمالی حصے میں اسرائیلی فورسز اور فلسطینی جماعتوں کے درمیان جاری لڑائی کے دوران پیش آیا۔
حماس کی عسکری ونگ القسام بریگیڈز کا بیان
دوسری جانب، حماس کے عسکری ونگ القسام بریگیڈز نے اسرائیلی فوجیوں پر حملے کی ذمہ داری قبول کی ہے۔ القسام بریگیڈز کے ایک بیان میں کہا گیا کہ خان یونس کے مر تاجہ چوک کے قریب اسرائیلی فوجیوں کے ایک گروپ کو مارٹر فائر کے ذریعے نشانہ بنایا گیا۔
