علامہ اقبال انٹرنیشنل ایئرپورٹ لاہور کے نجی کارگو شیڈ میں گزشتہ رات آگ بھڑک اٹھی، تاہم بروقت کارروائی کے باعث کوئی جانی نقصان نہیں ہوا۔
پاکستان ایئرپورٹس اتھارٹی کے مطابق، آگ ایئرپورٹ کے ایپرن ایریا سے قریباً ایک کلومیٹر کے فاصلے پر واقع نجی کارگو شیڈ میں لگی۔ اطلاع ملتے ہی ریسکیو 1122 کی ٹیمیں اور پاکستان ایئر فورس کی گاڑیاں موقع پر پہنچ گئیں اور مشترکہ طور پر آگ بجھانے کا عمل شروع کیا۔
مزید پڑھیں: لاہور کے حفیظ سینٹر میں دوبارہ آگ بھڑک اٹھی، حفاظتی اقدامات پر سوالات
حادثے کے دوران ایئرپورٹ مینیجر، چیف آپریٹنگ آفیسر اور دیگر متعلقہ حکام موقع پر موجود تھے، جبکہ ایئرپورٹ کی پروازوں کی آمدورفت معمول کے مطابق جاری رہی۔
حکام کے مطابق آگ لگنے کی وجوہات جاننے کے لیے تحقیقات جاری ہیں، اور جائے وقوعہ کو فوری طور پر محفوظ علاقے کے طور پر سیل کر دیا گیا تھا۔
