پاکستان علما کونسل نے بلوچستان میں غیرت کے نام پر ایک خاتون کے قتل کو غیر شرعی، غیر اسلامی اور غیر قانونی فعل قرار دیتے ہوئے قاتلوں کے خلاف دہشتگردی کے قانون کے تحت سخت کارروائی کا مطالبہ کیا ہے۔
کونسل کے جاری کردہ اعلامیے میں چیئرمین حافظ محمد طاہر محمود اشرفی، مولانا اسعد زکریا قاسمی، مولانا طاہر عقیل اعوان، مولانا محمد اسلم صدیقی، مولانا احمد اشفاق پتافی، مفتی عمرفاروق، اور دیگر رہنماؤں کے دستخط شامل ہیں۔ انہوں نے کہا کہ ایسے واقعات شریعت، قانون اور انسانی اقدار کے خلاف ہیں اور ریاست کو چاہیے کہ فوری ایکشن لے۔
مزید پڑھیں: بلوچستان: مرد و خاتون کے بہیمانہ قتل کی ویڈیو وائرل، وزیراعلیٰ کا نوٹس، ملزمان کی فوری گرفتاری کا حکم
علما نے وزیراعلیٰ بلوچستان، گورنر بلوچستان اور آئی جی پولیس سے مطالبہ کیا کہ اس دل دہلا دینے والے واقعے میں ملوث عناصر کو فوری گرفتار کر کے انسداد دہشتگردی کی عدالت میں مقدمہ چلایا جائے، اور مجرموں کو اسی جگہ، اسی انداز میں عبرتناک سزا دی جائے تاکہ معاشرے کو پیغام ملے کہ ایسی بربریت ناقابل قبول ہے۔
اعلامیے میں مزید کہا گیا کہ اسلام عورت کو نکاح کے فیصلے میں مکمل حق دیتا ہے، اور شادی سے پہلے اس کی رضامندی ضروری ہے، اس حوالے سے شریعت میں واضح احکامات موجود ہیں۔
پاکستان علما کونسل نے میڈیا اور رائے عامہ سے اپیل کی کہ وہ اس ظلم کے خلاف آواز بلند کریں تاکہ انصاف یقینی بنایا جا سکے۔
