شاہراہ ناران بابوسر اور قراقرم ہائی وے پر حالیہ سیلابی صورتحال کے باعث ریسکیو آپریشن بھرپور انداز میں جاری ہے۔ حکام کے مطابق لاپتا افراد کی تلاش کے لیے ہر ممکن وسائل بروئے کار لائے جا رہے ہیں جبکہ پاک فوج بھی امدادی سرگرمیوں میں بھرپور حصہ لے رہی ہے۔
ریسکیو ذرائع کا کہنا ہے کہ ضرورت پڑنے پر افواجِ پاکستان کے تعاون سے ہیلی کاپٹرز کو بھی ریسکیو آپریشن میں شامل کیا جائے گا تاکہ دشوار گزار علاقوں تک بروقت رسائی ممکن بنائی جا سکے۔
مزید پڑھیں: موسم سرما کا آغاز: بابو سر ٹاپ پر شدید برفباری، درجہ حرارت منفی پہنچ گیا
سیلاب سے متاثرہ سڑکوں کی بحالی کا کام ہنگامی بنیادوں پر جاری ہے، تاہم موجودہ حالات کے پیش نظر شاہراہ قراقرم اور شاہراہ ناران بابوسر ہر قسم کی ٹریفک کے لیے بند کر دی گئی ہے۔
ریسکیو حکام اور ضلعی انتظامیہ نے مسافروں اور سیاحوں سے اپیل کی ہے کہ وہ فی الحال ان علاقوں کا سفر نہ کریں اور مقامی انتظامیہ کی ہدایات پر عمل کریں۔
لاپتا افراد کی تلاش اور سڑکوں کی بحالی کے لیے تمام تر دستیاب وسائل استعمال میں لائے جا رہے ہیں تاکہ جلد از جلد معمولات زندگی بحال کیے جا سکیں۔
واضح رہے کہ گلگت بلتستان میں شاہراہ تھک بابوسر پر اچانک آنے والے سیلابی ریلے نے تباہی مچا دی، جس کے نتیجے میں 3 سیاح جاں بحق، 4 زخمی جبکہ 15 سے زائد سیاح لاپتا ہو گئے ہیں۔
ترجمان حکومت گلگت بلتستان ۔ فیض اللہ فراق کے مطابق گلگت بلتستان میں شاہراہ تھک بابوسر پر اچانک سیلابی ریلا آگیا، جس نے دیکھتے ہی دیکھتے تباہی مچادی، 3 سیاح سیلابی ریلے کی نذر ہوکر جاں بحق ہوگئے جبکہ 15 سے زیادہ سیاح لاپتا ہیں، 8 سے زائد گاڑیاں پانی میں بہہ گئیں، سینکڑوں سیاح مختلف مقامات پر پھنسے ہوئے ہیں۔
