رائل سعودی نیول فورسز کے سربراہ وائس ایڈمرل عبدالرحمن الغریبی نے نیول ہیڈکوارٹرز اسلام آباد میں سربراہ پاک بحریہ ایڈمرل نوید اشرف سے ملاقات کی، جس میں باہمی دلچسپی کے امور، خطے کی سیکیورٹی صورتحال اور بحری تعاون پر تفصیلی تبادلہ خیال کیا گیا۔
آئی ایس پی آر کے مطابق سعودی بحریہ کے سربراہ کی آمد پر پاک بحریہ کے چاک و چوبند دستے نے انہیں گارڈ آف آنر پیش کیا۔ ملاقات کے دوران ایڈمرل نوید اشرف نے ریجنل میری ٹائم سیکیورٹی پٹرولز کے ذریعے امن و استحکام کو یقینی بنانے کے لیے پاک بحریہ کے اقدامات پر روشنی ڈالی۔
مزید پڑھیں: صدر مملکت کی جانب سے سعودی نیول چیف کو نشان پاکستان (ملٹری) کا اعزاز
وائس ایڈمرل الغریبی نے خطے میں بحری سیکیورٹی کو درپیش چیلنجز سے نمٹنے کے لیے پاکستان کی کاوشوں کو سراہا اور پاکستان نیول اکیڈمی میں سعودی کیڈٹس کو فراہم کی جانے والی اعلیٰ معیار کی تربیت پر اطمینان کا اظہار کیا۔
ملاقات میں دونوں ممالک کے درمیان دفاعی تعاون کو وسعت دینے، بالخصوص بحری شعبے میں روابط مزید مستحکم کرنے کے عزم کا اعادہ کیا گیا۔
ترجمان پاک بحریہ کے مطابق، سعودی نیول چیف کا حالیہ دورہ دونوں برادر ممالک اور ان کی مسلح افواج کے مابین باہمی اعتماد اور دفاعی شراکت داری کو نئی بلندیوں تک لے جانے کا باعث بنے گا۔
