ڈی جی ایف آئی اے رفعت مختار راجہ کی ہدایت پر حوالہ ہنڈی اور غیر قانونی کرنسی ایکسچینج میں ملوث نیٹ ورکس کے خلاف گھیرا تنگ کر دیا گیا ہے۔
یہ بھی پڑھیں:ایف آئی اے کی کراچی ایئرپورٹ پر کارروائیاں، 3 ملزمان گرفتار
اس سلسلے میں ایف آئی اے بلوچستان زون نے کامیاب کارروائیاں کرتے ہوئے پانچ ملزمان کو گرفتار کر لیا ہے۔
ترجمان ایف آئی اے کے مطابق گرفتار ہونے والے افراد میں اکمل خان، سیف اللہ، بشیر احمد، عبدالقیوم اور عبداللہ شامل ہیں جنہیں کوئٹہ اور چمن کے مختلف علاقوں میں چھاپوں کے دوران گرفتار کیا گیا۔
یہ بھی پڑھیں:ایف آئی اے کی کارروائی، جعلی ویزے پر بیرون ملک جانے والا ملزم گرفتار
کارروائیوں کے دوران مجموعی طور پر 6 لاکھ 84 ہزار پاکستانی روپے اور غیر ملکی کرنسی کی مد میں 230.5 ملین ایرانی ریال، 1 لاکھ 35 ہزار سے زائد افغانی، 700 امریکی ڈالر، 200 سعودی ریال اور 150 آسٹریلین ڈالر برآمد کیے گئے۔
مزید برآمدات میں چیک بکس، حوالہ ہنڈی سے متعلق رسیدیں اور بینک ڈپازٹ سلپس شامل ہیں۔
ایف آئی اے کے مطابق تمام ملزمان بغیر لائسنس کے کرنسی ایکسچینج کے غیر قانونی کاروبار میں ملوث تھے اور برآمد ہونے والی رقوم سے متعلق تسلی بخش جواب دینے میں ناکام رہے۔
ملزمان کے خلاف باقاعدہ تفتیش کا آغاز کر دیا گیا ہے اور مزید انکشافات متوقع ہیں۔
ایف آئی اے کا کہنا ہے کہ کرنسی اسمگلنگ اور غیر قانونی مالیاتی سرگرمیوں کے خلاف کارروائیاں بلا امتیاز جاری رہیں گی۔
