پاکستان تحریک انصاف (پی ٹی آئی) کے رہنما و سینیئر وکیل سلمان اکرم راجا نے اعلان کیا ہے کہ وہ اڈیالہ جیل کے لیے روانہ ہو رہے ہیں، ابھی احتجاج کا آخری دن نہیں بلکہ آغاز ہے، گرفتاریوں، مارپیٹ، چھاپے، سب کا جائزہ لے رہے ہیں۔
یہ بھی پڑھیں: پی ٹی آئی رہنما شیخ وقاص کی قومی اسمبلی کی سیٹ خطرے میں، مگر کیوں؟
میڈیا سے گفتگو کرتے ہوئے جب ان سے پوچھا گیا کہ اس وقت پی ٹی آئی کی مرکزی قیادت احتجاج کی قیادت کہاں سے کر رہی ہے، تو سلمان اکرم راجہ نے بتایا کہ ارکانِ اسمبلی اپنے اپنے حلقوں میں موجود ہیں، ابھی گھروں سے نکلیں گے، کیونکہ پارلیمانی سیشن جاری تھا۔
🚨ابھی دن چل رہا ہے، یہ کوئی آخری دن نہیں، ہمارے لوگ گرفتار ہورہے ہیں، گھر توڑے جارہے ہیں، سلمان اکرم راجہ pic.twitter.com/1YBw2PqBbc
— Mehwish Qamas Khan (@MehwishQamas) August 5, 2025
انہوں نے کہا کہ یہ احتجاج کا آخری دن نہیں بلکہ آغاز ہے۔ پارٹی کی حکمتِ عملی طے شدہ ہے اور تمام پہلوؤں کا جائزہ لیا جا رہا ہے۔ ان کے مطابق ملک بھر سے گرفتاریوں، مارپیٹ، اور کارکنوں کے گھروں پر چھاپوں کی اطلاعات موصول ہو رہی ہیں۔
یہ بھی پڑھیں: احتجاجی تحریک: پی ٹی آئی اسلام آباد نے اپنی حکمت عملی کا اعلان کردیا
انہوں نے الزام عائد کیا کہ ریحانہ ڈار کو گرفتار کیا گیا ہے جبکہ لاہور سے 2 ایم پی ایز کو بھی حراست میں لے لیا گیا ہے۔ اس تمام صورتحال کے باوجود، پارٹی قیادت بھرپور احتجاج کی تیاری کر رہی ہے۔
ایک صحافی نے جب پوچھا کہ اڈیالہ جیل جانے والے راستے بند ہیں تو وہ کیسے پہنچیں گے، تو سلمان اکرم راجا نے دوٹوک جواب میں کہا کہ اڑ کے تو نہیں جائیں گے، جیسے جاتے ہیں جائیں گے۔
