سینیئر اداکارہ عتیقہ اوڈھو نے انکشاف کیا ہے کہ شوہر سے خراب تعلقات کا ذکر کرنے کے بعد انہیں رشتے بھیجے جا رہے ہیں۔
عتیقہ اوڈھو کے مطابق گزشتہ ہفتے انہوں نے کہا تھا کہ ڈرامے دیکھ دیکھ کر ان کی شادی خطرے میں ہے۔ وہ بیان اتنا وائرل ہوا کہ اس کے بعد سوشل میڈیا پر مجھے بہت ساری ہمدردیاں مل رہی ہیں، میرا ڈی ایم میسجز سے بھرا ہوا ہے اور لوگ مجھے واقعی میں رشتے بھیج رہے ہیں۔
ان کا کہنا تھا کہ آج اسی لیے میں تیار ہو کر غرارہ پہن کر دلہن کی طرح بیٹھ گئی ہوں کہ کوئی پتا نہیں۔ ساتھ ہی انہوں نے کہا کہ خواتین! اپنے شوہروں کو تھوڑا سا دباؤ میں رکھنا بھی فائدہ مند ہوتا ہے۔
اداکارہ نے مزید کہا کہ اب میں نے سیکھ لیا ہے کہ ہم سوشل میڈیا کو مختلف طریقوں سے ہوشیاری سے استعمال کر سکتے ہیں۔ یہ ایک بہت مؤثر ذریعہ ہو سکتا ہے۔ میرا مطلب ہے، یہ اپنے پیغام کو پہنچانے کا بہترین ذریعہ ہے۔ ساری دشمنیاں اور سازشیں ادھر سے کر سکتے ہیں۔
واضح رہے کہ عتیقہ اوڈھو ایک سینیئر پاکستانی ٹیلی ویژن اور فلمی اداکارہ ہیں، جنہیں ان کی خوبصورتی اور شاندار اداکاری کے باعث بے حد سراہا جاتا ہے۔ وہ ’ہم سفر‘، ’نجات‘، ’ستارہ اور مہرالنسا‘، ’بے شرم‘، ’دشت‘، ’داؤ‘، ’پیار کے صدقے‘، ’کیسی تیری خود غرضی‘ اور ’انتہا‘ جیسے مقبول ڈراموں میں اپنے کرداروں کی وجہ سے مشہور ہیں۔ اس وقت عتیقہ اوڈھو ڈرامہ ’شیر‘ اور ’پیراڈائز‘ میں اپنی جاندار اداکاری پر خوب داد سمیٹ رہی ہیں۔ وہ 24 نیوز ایچ ڈی کے ڈرامہ ریویو شو ’کیا ڈرامہ ہے‘ کی بھی پسندیدہ میزبان ہیں۔
