الیکشن کمیشن آف پاکستان نے اعلان کیا ہے کہ قومی اسمبلی کے حلقہ این اے 66 وزیرآباد، این اے 129 لاہور۔XIII اور صوبائی اسمبلی کے حلقہ پی پی 87 میانوالی۔III کے ضمنی انتخابات میں پوسٹل بیلٹ پیپرز کے لیے درخواست جمع کرانے کی آخری تاریخ یکم ستمبر 2025 مقرر کی گئی ہے۔
ترجمان الیکشن کمیشن کے مطابق قانون کے تحت یہ سہولت سرکاری ملازمین، پاک فوج کے افسران و جوانوں، ان کے بیوی اور بچوں کو بھی حاصل ہے، بشرطیکہ وہ رجسٹرڈ ووٹرز ہوں اور اپنے اہل خانہ کے ساتھ حلقہ انتخاب سے باہر رہائش پذیر ہوں۔
یہ بھی پڑھیں: الیکشن کمیشن نے عمر ایوب کی نااہلی ریفرنس کی سماعت 20 اگست تک ملتوی کردی
ترجمان کے مطابق اسی طرح باہمی معذوری کے شکار افراد جو سفر کرنے کے قابل نہ ہوں اور جن کے پاس نادرا کا جسمانی معذوری کا لوگو والا قومی شناختی کارڈ ہو، بھی اس سہولت سے استفادہ کر سکتے ہیں۔ اس کے علاوہ جیل یا حراست میں موجود قیدی بھی پوسٹل بیلٹ کے حق دار ہیں۔
بیان میں مزید کہا گیا کہ وہ افراد جنہیں ریٹرننگ آفیسر نے الیکشن ڈیوٹی کے لیے تعینات کیا ہو، بشمول پولیس اہلکاران، اپنی تعیناتی کے تین دن کے اندر پوسٹل بیلٹ کے لیے درخواست متعلقہ ریٹرننگ آفیسر کو جمع کروائیں۔ پوسٹل بیلٹ کی درخواست مقررہ فارم پر متعلقہ حلقہ کے دفاتر میں جمع کرائی جا سکتی ہے۔
ترجمان نے بتایا کہ پوسٹل بیلٹ کا فارم الیکشن کمیشن کی ویب سائٹ سے بھی ڈاؤن لوڈ کیا جا سکتا ہے۔ وہ ووٹرز جنہیں پوسٹل بیلٹ جاری کیا جاتا ہے، وہ پولنگ اسٹیشن پر ووٹ ڈالنے کے اہل نہیں ہوں گے۔
یہ بھی پڑھیں: الیکشن کمیشن نے قومی و صوبائی اسمبلیوں کے 3 اور سینیٹ کی ایک نشست پر ضمنی انتخابات کا شیڈول جاری کردیا
مزید کہا گیا کہ پوسٹل بیلٹ کی درخواست ووٹر کے متعلقہ دفتر یا محکمہ سے تصدیق شدہ ہونی ضروری ہے تاکہ غیر مجاز افراد اس سہولت کا غلط استعمال نہ کر سکیں۔
