پی ٹی آئی کی دیگر اعلٰی قیادت اڈیالہ جیل منتقل، وزیر اعلٰی گلگت بلتستان بھی نظر بند

پولیس نے پی ٹی آئی کی گرفتار اعلیٰ قیادت کے تینوں رہنماؤں شاہ محمود قریشی، اسد عمر اور فواد چوہدری کو اڈیالہ جیل منتقل کردیا۔ وزیر اعلیٰ گلگت بلتستان خالد خورشید کو جی بی ہاؤس میں نظر بند کر دیا گیا۔ پی ٹی آئی کے رہنما علی محمد خان کو بھی سپریم کورٹ جاتے ہوئے سرینا چوک سے گرفتار کیا۔ا

پولیس نے پی ٹی آئی کے رہنماؤں کو گزشتہ روز نقص امن کے خطرات کی وجہ سے تھری ایم پی او کے تحت گرفتار کیا تھا۔ اسد عمر کو اسلام آباد ہائیکورٹ اور فواد چوہدری کو سپریم کورٹ کے احاطے سے جب کہ شاہ محمود قریشی کو جی بی ہاؤس سے گرفتار کیا گیا تھا۔

پولیس کی جانب سے گرفتار تینوں رہنماؤں شاہ محمود قریشی، اسد عمر اور فواد چوہدری کو اڈیالہ جیل منتقل کر دیا گیا ہے۔

تحریک انصاف کے مرکزی رہنماؤں کی گرفتاری کے بعد وزیر اعلٰی گلگت بلتستان خالد خورشید کو دارالحکومت کے گلگت بلتستان ہاؤس میں نظر بند کرتے ہوئے رینجرز اور پولیس کی بھاری نفری جی بی ہاؤس کے باہر تعینات کر دی گئی ہے۔

ذرائع کے مطابق پولیس نے علی الصبح وزیر اعلٰی گلگت بلتستان کو اسلام آباد کے ریڈ زون میں واقع گلگت بلتستان ہاؤس سے گرفتار کرنے کی کوشش کی، تاہم بعد میں ان کی نقل و حرکت پر پابندی عائد کرتے ہوئے انہیں جی بی ہاؤس میں نظر بند کردیا گیا ہے۔

اس موقع پر گلگت بلتستان ہاؤس میں موجود تحریک انصاف کے سینیٹر اعجاز چوہدری نے اپنے ساتھیوں سمیت رضاکارانہ گرفتاری دی ہے۔ اس سے قبل شاہ محمود قریشی، فواد چوہدری، مسرت اقبال چیمہ اور ملیکہ بخاری سمیت دیگر رہنماؤں کو بھی اسلام آباد سے گرفتار کیا جاچکا ہے۔ دارالحکومت سمیت ملک کے بیشتر بڑے شہروں میں حکومت نے امن و امان کی صورتحال کنٹرول کرنے کے لیے فوج طلب کرلی ہے۔

اس سے قبل سابق ڈپٹی اسپیکر قومی اسمبلی اور پی ٹی آئی کے مرکزی سینئر نائب صدر قاسم سوری کے خلاف قتل اور دہشتگردی کا مقدمہ درج کرلیا گیا ہے۔ مبین خلجی، ڈاکٹر منیر بلوچ، خادم حسین وردک اور باری بڑیچ سمیت دیگر رہنماؤں کو بھی مقدمے میں نامزد کیا گیا ہے۔

پولیس کے مطابق قاسم سوری سمیت مبین خلجی، ڈاکٹر منیر بلوچ، خادم حسین وردک، باری بڑیچ اور دیگر رہنماؤں کے خلاف قتل، اقدام قتل، دہشتگردی، سرکاری اسلحہ چھینے، بغاوت، کار سرکار میں مداخلت سمیت 18 دفعات کے تحت مقدمات درج کیے گئے ہیں۔

سابق ڈپٹی اسپیکر قومی اسمبلی قاسم سوری اور دیگر کے خلاف ایف آئی ار کا عکس: تصویر وی نیوز

ایف آئی آر کوئٹہ کے بجلی روڈ تھانے کے ایس ایچ او کی مدعیت میں درج کی گئی۔ ایف آئی آر کے مطابق پی ٹی آئی کے رہنماؤں اور کارکنوں نے قاسم سوری اور مبین خلجی کی ہدایات پر ائیر پورٹ روڈ پر مظاہرہ کر تے ہوئے سڑک بلاک کرکے جلاؤ گھیراؤ کیا۔

رپورٹ کے مطابق مظاہرین کو اکساتے ہوئے عسکری چیک پوسٹ پر حملے کی کوشش کی گئی۔ پولیس کی جانب سے روکنے پر مظاہرین نے براہ راست فائرنگ شروع کردی جس میں عمر عزیز نامی شخص جاں بحق ہوا اور 7 افراد زخمی ہوئے۔

یہ بھی پڑھیں: سابق ڈپٹی اسپیکر قاسم سوری کے خلاف قتل اور دہشتگردی کا مقدمہ درج

تحریک انصاف کے احتجاج کے دوران پنجاب میں سرکاری و نجی اداروں پر حملوں، توڑ پھوڑ ، جلاؤ گھیراؤ میں ملوث 1650 سے زائد شرپسند عناصر اب تک گرفتار کیے جاچکے ہیں۔

ترجمان پنجاب پولیس کے مطابق شرپسند عناصر کی پرتشدد کاروائیوں میں پنجاب بھر میں 150 سے زائد افسران واہلکار شدید زخمی ہوئے، جب کہ پنجاب پولیس کے زیر استعمال 70 گاڑیاں یا تو توڑ پھوڑ کا نشانہ بنیں یا پھر نذر آتش کردی گئیں۔

آئی جی پنجاب پولیس ڈاکٹر عثمان انور کے مطابق تمام شرپسند عناصر کو ٹریس کرکے گرفتار کیا جارہا ہے۔ ’سرکاری و نجی املاک، پولیس ٹیموں پر حملوں ، پر تشدد کاروائیوں میں ملوث شرپسند کسی رعایت کے مستحق نہیں۔‘

پولیس ذرائع کے مطابق دارالحکومت اسلام آباد سے بدھ کے روز تحریک انصاف کے 115 کارکنان کو گرفتار کیا گیا جن میں 20 خواتین بھی شامل ہیں۔ دوسری جانب راولپنڈی سے اب تک پی ٹی آئی کے 190 کارکنان کو گرفتار کیا جا چکا ہے۔

کراچی میں خواتین پولیس آفیسرز تحریک انصاف کی ایک خاتون کارکن کو ملینیئم مال سے گرفتارکرکے لے جارہی ہیں۔ (فوٹو: اے این)

اسلام آباد میں پولیس نے رات گئے کارروائی کرتے ہوئے سرکاری املاک کو نقصان پہنچانے والے مزید 80 افراد گرفتار کرلیے ہیں۔

ترجمان اسلام آباد پولیس کے مطابق، ان گرفتار افراد میں ترنول ریلوے اسٹیشن کو آگ لگانے ، فائرنگ کرنے اور پٹڑی اکھاڑنے والے ملزمان بھی شامل ہیں۔ اس قبل جلاؤ گھیراؤ کرنے والے 108 افراد کو گرفتار کیا گیا تھا۔

دوسری جانب اسلام آباد کے ہسپتال پمز اور پولی کلینک میں 25 زخمی پولیس اہلکار علاج کی غرض سے لائے جاچکے ہیں۔

عمران خان کی گرفتاری کے خلاف پاکستان تحریک انصاف کی جانب سے ملک بھر میں احتجاج کا سلسلہ دوسرے روز بدھ کو بھی جاری رہا اور کئی مقامات پر حالات کشیدہ ہوئے۔ پشاور میں بدھ کے روز 3 افراد ہلاک ہوئے۔

اسلام آباد میں بھی کئی مقامات پر حالات کشیدہ رہے۔ وزارت داخلہ کی سفارش پر کابینہ نےاسلام آباد سمیت خیبر پختونخوا اور پنجاب میں فوج طلب کرنے کی منظوری دی تھی جس کے بعد فوجی دستے دارالحکومت میں پہنچ گئے ہیں۔

شاہ محمود اور فواد چوہدری کی اسلام آباد میں گرفتاری

رات گئے موصول اطلاعات کے مطابق وائس چیئرمین تحریک انصاف شاہ محمود قریشی کو رات گئے گلگت بلتستان ہاؤس سے 3 ایم پی او تحت گرفتار کرکے نامعلوم مقام پر منتقل کردیا ہے۔

گرفتاری سے قبل اپنے ویڈیو بیان میں شاہ محمود قریشی کا کہنا تھا کہ اگر انہیں مزید مہلت نہیں ملتی تو یہ پیغام دے کر جانا چاہتے ہیں کہ حقیقی آزادی کی جدوجہد جاری رہنی چاہیے۔

’عمران خان نے مجھے ذمہ داری سونپی تھی، اس ذمہ داری کو نبھانے کی کوشش کررہا تھا اور کی ہے۔۔۔ یہ تحریک حقیقی آزادی کی تحریک ہے، ہم سب نے مل کر اس میں حصہ ڈالا ہے۔۔۔ عمران خان کی آزادی تک آپ اپنی جستجو میں گامزن رہیں۔‘