مری ٹورازم ڈویلپمنٹ کارپوریشن پنجاب نے اعلان کیا ہے کہ مری کی چیئرلفٹ اور کیبل کار کو 18 اگست سے عارضی طور پر بند کر دیا گیا ہے۔ اس فیصلے کی بنیادی وجہ مون سون بارشیں اور خراب موسم بتایا گیا ہے جس سے کسی بھی ناخوشگوار واقعے کا خدشہ بڑھ سکتا تھا۔
انتظامیہ کے مطابق یہ اقدام سیاحوں کی جان و مال کی حفاظت کو یقینی بنانے کے لیے کیا گیا ہے۔ ترجمان مری ٹورازم ڈویلپمنٹ کارپوریشن کا کہنا ہے کہ بارشوں اور تیز ہواؤں کے باعث چیئرلفٹ اور کیبل کار کے آپریشن کو جاری رکھنا خطرناک ثابت ہو سکتا تھا، اس لیے فی الفور بندش کا فیصلہ ناگزیر تھا۔
یہ بھی پڑھیں بٹگرام چیئر لفٹ ریسکیو: پاک فوج نے زندگی و موت کے بیچ جھولتی تمام 8 جانیں بچالیں
ترجمان نے مزید بتایا کہ جیسے ہی موسم بہتر ہو گا اور صورتحال معمول پر آئے گی، چیئرلفٹ اور کیبل کار کی بحالی کا نیا شیڈول جاری کر دیا جائے گا۔ شہریوں اور سیاحوں سے اپیل کی گئی ہے کہ وہ انتظامیہ کے ساتھ تعاون کریں اور اپنی تفریحی سرگرمیوں کے دوران احتیاطی تدابیر پر عمل کریں۔
یہ بھی پڑھیں مری جانیوالے خبردار رہیں، سالگراں کے مقام پر لینڈ سلائیڈنگ، ٹریفک معطل
مری اس وقت ملک بھر سے آنے والے سیاحوں کے لیے مرکزِ نگاہ ہے، تاہم مسلسل بارشوں اور موسم کی غیر یقینی صورتحال کے باعث حکام نے حفاظتی اقدامات کو اولین ترجیح دینے کا فیصلہ کیا ہے۔
