ٹیکنالوجی کمپنی ایپل نے اپنے نئے آئی فون 17 سیریز کی لانچنگ کی تاریخ کا باضابطہ اعلان کردیا ہے، لانچنگ تقریب 9 ستمبر کو کیلیفورنیا کے کیوپرٹینو میں اسٹیو جابز تھیٹر میں منعقد ہوگی، جسے ’آ وی ڈراپنگ‘ ایونٹ کا نام دیا گیا ہے۔
ایپل کے مطابق آئی فون 17 سیریز میں چار ماڈلز متعارف کرائے جائیں گے جن میں آئی فون 17، آئی فون 17 پرو، آئی فون 17 پرو میکس اور ایک بالکل نیا ماڈل آئی فون 17 ایئر شامل ہوگا۔ یہ نیا ماڈل اپنی الٹرا پتلی ڈیزائن کے باعث سب سے زیادہ توجہ حاصل کرے گا۔
یہ بھی پڑھیں: فولڈ ایبل آئی فون 17 ایئر کب لانچ ہوگا، خصوصیات کیا ہیں؟
سیریز کے تمام فونز میں اے 19 اور اے 19 پرو چِپس نصب ہوں گی جو کارکردگی اور بیٹری لائف کو نمایاں طور پر بہتر بنائیں گی۔ اس کے علاوہ پرو ماڈلز میں بالکل نیا کیمرا ماڈیول دیا جائے گا جس میں کم روشنی میں بھی اعلیٰ معیار کی فوٹوگرافی کی سہولت دستیاب ہوگی۔
ڈیزائن کے لحاظ سے بھی ایپل نے بڑی تبدیلیاں کی ہیں۔ پرو ماڈلز کو زیادہ مضبوط ایلومینیم فریم کے ساتھ تیار کیا جارہا ہے جبکہ آئی فون 17 ایئر کے متعلق کہا جارہا ہے کہ یہ اب تک کا سب سے ہلکا اور پتلا آئی فون ہوگا۔
ایونٹ میں ایپل واچ سیریز 11 بھی متعارف کرائی جائے گی جس میں جدید ہیلتھ ٹریکنگ فیچرز شامل ہوں گے۔ اس کے علاوہ ایپل واچ ایس ای 3 اور رگڈ الٹرا 3 بھی پیش کی جائیں گی جو سیٹلائٹ کنیکٹیوٹی کے ساتھ صارفین کو ہنگامی حالات میں مزید سہولت فراہم کریں گی۔
یہ بھی پڑھیں: آئی فون 17 سیریز کی رونمائی کب ہوگی؟ تاریخ سامنے آگئی
کمپنی کے ایئر پوڈز میں بھی بڑی اپ گریڈ متوقع ہے، جن میں اے آئی فیچرز اور بہتر نوائز کینسلیشن شامل ہوگا۔
ٹیک ماہرین کے مطابق امکان ہے کہ ایپل اپنی مصنوعات کو نہ صرف اسمارٹ بلکہ زیادہ ’انسان دوست‘ بنانے کے لیے نئے فیچرز سامنے لائے گا۔ اس اعلان کے بعد صارفین اور ماہرین میں خاصا جوش و خروش پایا جاتا ہے اور سب کی نظریں اب 9 ستمبر کے ایونٹ پر مرکوز ہیں۔
