پاک افواج نے ملک میں مارشل لا کی افواہوں کی سختی سے تردید کرتے ہوئے کہا ہے کہ پاکستان آرمی چیف سمیت پوری عسکری قیادت جمہوریت پر یقین رکھتی ہے لہٰذا ملک میں مارشل لا کے نفاذ کا سوال ہی پیدا نہیں ہوتا۔
پاک افواج کے محکمہ تعلقات عامہ (آئی ایس پی آر ) کے ڈائریکٹر جنرل میجر جنرل احمد شریف چوہدری نے نجی ٹی وی چینل سے گفتگو کرتے ہوئے ملک میں مارشل لا کے نفاذ کے حوالے سے گردش کرنے والی افواہوں اور قیاس آرائیوں کو غلط اور گمراہ کن قرار دیا۔
انہوں نے کہا کہ پاکستان آرمی چیف جنرل عاصم منیر سمیت افواج پاکستان کی پوری عسکری قیادت جمہوریت پر یقین رکھتی ہے۔ انہوں نے ان اطلاعات کی بھی تردید کی کہ پاک افواج کے کسی آفسر نے استعفیٰ دیا ہے۔
میجر جنرل احمد شریف چوہدری نے کہا کہ اندرونی شر پسندوں اور بیرونی دشمنوں کی چالوں کے باوجود پاک افواج چیف آف آرمی اسٹاف جنرل عاصم منیر کی قیادت میں متحد ہیں اور ہمیشہ متحد رہیں گی۔