انتظامی معاملات پر غور کے لیے سپریم کورٹ کا فل کورٹ اجلاس 8 ستمبر کو طلب کر لیا گیا ہے۔
ذرائع کے مطابق اجلاس چیف جسٹس پاکستان یحییٰ آفریدی کی زیر صدارت دن ایک بجے ہوگا۔
یہ بھی پڑھیں:اسلام آباد ہائیکورٹ کا فل کورٹ اجلاس، اہم معاملات ایجنڈے میں شامل
ذرائع کا کہنا ہے کہ اجلاس صرف ایک نکاتی ایجنڈا پر مشتمل ہوگا جس میں سپریم کورٹ رولز 2025 میں ترامیم کا جائزہ لیا جائے گا۔
صدر سپریم کورٹ بار ایسوسی ایشن نے اس حوالے سے تحریری تجاویز سپریم کورٹ کو بھجوائی ہیں جن میں عدالتی فیسوں میں اضافے کی واپسی کا مطالبہ بھی شامل ہے۔
ذرائع کے مطابق تاحال کسی جج نے رولز میں ترامیم کے لیے تجاویز جمع نہیں کروائیں۔
واضح رہے کہ سپریم کورٹ رولز 2025 سرکولیشن کے ذریعے اکثریت سے منظور کیے گئے تھے تاہم اختلاف کرنے والے ججز کی رائے تھی کہ رولز فل کورٹ اجلاس سے منظور کرائے جائیں۔
یہ بھی پڑھیں:’وکیل صاحب! چاہے جتنی تقریر کر لیں، ضمانت نہیں ہو سکتی‘، سپریم کورٹ نے ایسا کیوں کہا؟
اختلاف کرنے والے ججز نے 15 دن گزرنے کے باوجود کوئی تجاویز نہیں دیں۔ ذرائع کے مطابق سپریم کورٹ بار کی تجاویز پر فل کورٹ اجلاس میں غور ہوگا۔
اجلاس سے قبل سپریم کورٹ میں نئے عدالتی سال کی تقریب کا اہتمام بھی کیا جائے گا جبکہ اس موقع پر سپریم کورٹ میں قائم کیے گئے سہولت مرکز کا افتتاح بھی کیا جائے گا۔
