خیبرپختونخوا کے مختلف علاقوں میں سیکیورٹی فورسز نے کارروائی کرتے ہوئے بھارتی پراکسی فتنہ الخوارج کے 19 دہشتگردوں کو ہلاک کردیا۔
پاک فوج کے شعبہ تعلقات عامہ (آئی ایس پی آر) کے مطابق 9 اور 10 ستمبر کو خیبرپختونخوا کے مختلف اضلاع میں 3 الگ الگ کارروائیوں کے دوران بھارتی پراکسی گروہ فتنہ الخوارج سے تعلق رکھنے والے 19 دہشتگرد ہلاک کردیے گئے ہیں۔
یہ بھی پڑھیں: بنوں میں سیکیورٹی فورسز کا آپریشن، 3 خوارجی ہلاک، 2 زخمی
آئی ایس پی آر کے مطابق ایک انٹیلیجنس بیسڈ آپریشن ضلع مہمند کے علاقے گلونو میں کیا گیا، جہاں خوارج کی موجودگی کی اطلاع پر سیکیورٹی فورسز نے مؤثر کارروائی کی۔ شدید فائرنگ کے تبادلے کے بعد 14 بھارتی پراکسی دہشتگرد ہلاک ہوئے۔
On 9-10 September, nineteen Khwarij belonging to Indian Proxy, Fitna al Khwarij were sent to hell in three separate engagements in Khyber Pakhtunkhwa Province.
On reported presence of Khwarij, an intelligence based operation was conducted by the Security Forces in general area… pic.twitter.com/fA6eMWXZGj
— DG ISPR (@OfficialDGISPR) September 11, 2025
شمالی وزیرستان کے علاقے دتہ خیل میں بھی انٹیلیجنس کی بنیاد پر کارروائی کی گئی، جس میں مزید 4 دہشتگرد مارے گئے، اسی طرح بنوں ضلع میں ہونے والے ایک اور مقابلے میں ایک دہشتگرد کو ہلاک کر دیا گیا۔
آئی ایس پی آر کے مطابق ہلاک دہشتگردوں سے اسلحہ و گولہ بارود بھی برآمد کیا گیا۔ یہ دہشتگرد علاقے میں متعدد دہشت گردانہ سرگرمیوں میں ملوث تھے۔
یہ بھی پڑھیں: پشین اور ژوب میں آپریشن، 2 خوارجی ہلاک 5 گرفتار: آئی ایس پی آر
ترجمان کا کہنا ہے کہ علاقے میں کلیئرنس آپریشن جاری ہے تاکہ کسی بھی چھپے دہشتگرد کو ختم کیا جاسکے۔ پاک فوج نے بھارتی سرپرستی یافتہ دہشتگردی کے مکمل خاتمے کے لیے اپنے بھرپور عزم کا اعادہ کیا ہے۔
’قوم اپنی بہادر افواج پر فخر کرتی ہے‘
وزیراعظم شہباز شریف نے سیکیورٹی فورسز کی کامیاب کارروائیوں کو سراہتے ہوئے کہا ہے کہ قوم اپنی بہادر افواج پر فخر کرتی ہے۔ ان آپریشنز میں 19 دہشت گردوں کو جہنم واصل کیا گیا۔
وزیراعظم نے سیکیورٹی فورسز کے افسران اور جوانوں کی پیشہ ورانہ صلاحیتوں کو خراجِ تحسین پیش کرتے ہوئے کہا کہ دہشت گردی کی لعنت کے مکمل خاتمے تک جنگ جاری رکھی جائے گی۔
انہوں نے کہا کہ پاک فوج کے افسران و اہلکار فتنہ الخوارج اور فتنہ الہندوستان کے ناپاک عزائم کو خاک میں ملانے کے لیے دن رات سرگرم ہیں۔
انہوں نے مزید کہا کہ دفاعِ وطن کے غیر متزلزل عزم میں وہ خود سمیت پوری قوم کو افواجِ پاکستان کے ساتھ شانہ بشانہ کھڑا پاتے ہیں۔
وزیراعظم نے اس عزم کا اعادہ کیا کہ دہشت گردی کے ناسور کو جڑ سے اکھاڑ پھینکنے کے لیے ریاست اپنی بھرپور توانائیاں صرف کرے گی۔
