پاکستان ٹیلی ویژن (پی ٹی وی) کے سنہری دور کے معروف اداکار، ریڈیو، ٹی وی، اسٹیج اور فلموں کے ورسٹائل فنکار عشرت عباس خلیل انتقال کر گئے۔
پشاور میں پیدا ہونے والے عشرت عباس خلیل نے اپنے فن کا آغاز تھیٹر سے کیا اور بعدازاں ٹیلی ویژن سے وابستہ ہوگئے۔
انا للہ وانا علیہ راجعون
خیبر پختونخوا میں اداکاری کا ایک روشن باب اپنے
اختتام کو پہنچا۔ریڈیو،ٹی وی۔اسیٹج اور فلم کے نامور صدارتی ایوارڈ یافتہ اداکار عشرت عباس بھی اس جہاں فانی سے کوچ کر گئے ۔جمعہ اور ہفتہ کی درمیانی رات انہیں دل کا دورہ پڑا جو جان لیوا ثابت ہوا اور وہ خالق… pic.twitter.com/s0hjdY5KYn— Amjad Aziz Malik (T.I) (@AmjadAzizMalik1) September 13, 2025
پی ٹی وی کے مقبول ڈرامہ سیریلز اور اسٹیج ڈراموں میں ان کی قدرتی مکالمہ ادائیگی اور جذبات سے بھرپور اداکاری نے انہیں ناظرین میں خاص مقام دلایا۔ انہوں نے اردو کے ساتھ ساتھ ہندکو اور پشتو ڈراموں میں بھی اپنی فنی صلاحیتوں کا لوہا منوایا۔
عشرت عباس خلیل ثقافتی سرگرمیوں اور پروگراموں میں بھی پیش پیش رہے اور خیبر پختونخوا میں پرفارمنگ آرٹس کے فروغ کے لیے سرگرم کردار ادا کیا۔
ان کی فنکارانہ خدمات کے اعتراف میں انہیں متعدد اعزازات سے نوازا گیا، جن میں تمغہ برائے حسنِ کارکردگی بھی شامل ہے۔
مرحوم کے بھائی عمر دراز خلیل بھی فلم اور ٹی وی کے معروف اداکار تھے، جن کا 2016 میں انتقال ہوا تھا۔
ریڈیو پاکستان کے مطابق عشرت عباس خلیل زائد العمری میں دل کا دورہ پڑنے کے باعث انتقال کر گئے۔ ان کی نمازِ جنازہ 13 ستمبر کو پشاور میں ادا کی گئی، جس میں مختلف شعبہ ہائے زندگی سے تعلق رکھنے والے ہزاروں افراد نے شرکت کی۔ بعدازاں انہیں مقامی قبرستان میں سپردِ خاک کر دیا گیا۔
عشرت عباس خلیل کے انتقال پر فنکاروں، ساتھیوں، مداحوں اور اہلِ خانہ نے گہرے دکھ اور افسوس کا اظہار کیا۔
