وافی انرجی نے پاکستان میں دوسرا ریٹیل اسٹیشن لانچ کر دیا ہے جس کی تعمیر ری سائیکل شدہ پلاسٹک سے کی گئی ہے، پولیس لائنز راولپنڈی میں قائم اس جدید اسٹیشن کی تکمیل کمپنی کے پائیدار توانائی اور ماحولیاتی تحفظ کے عزم میں ایک اور سنگ میل ہے۔
یہ بھی پڑھیں: سعودی گروپ نے شیل پاکستان کے اکثریتی شیئرز حاصل کر لیے
اس منصوبے میں 7 ہزار 700 کلوگرام پلاسٹک ویسٹ استعمال کیا گیا ہے جو تقریباً 58 لاکھ پلاسٹک پیسز کے برابر ہے۔ ان پلاسٹک ویسٹ کو تعمیراتی بلاکس اور پیورز میں ڈھال کر اسٹیشن کی بنیادوں اور انفراسٹرکچر میں شامل کیا گیا،اس سے قبل وافی انرجی نے کراچی میں اپنی نوعیت کا پہلا اسٹیشن لانچ کیا تھا جہاں 6 ہزار 500 کلوگرام پلاسٹک (13 لاکھ پلاسٹک پیسز) استعمال کیا گیا۔
کراچی ہی میں کمپنی اپنے ہیڈ آفس کے سامنے 730 فٹ لمبی پلاسٹک روڈ بھی تعمیر کر چکی ہے جس میں 2.5 ٹن ویسٹ لبریکنٹ بوتلیں شامل کی گئی تھیں۔ یہ سڑک گرمی اور بارش کے باوجود پائیدار ثابت ہوئی اور مقامی کمیونٹی کے لیے سہولت بنی۔
افتتاحی تقریب سے خطاب کرتے ہوئے وافی انرجی کے سی ای او زبیر شیخ نے کہا کہ وافی انرجی کے لیے پائیداری محض ایک عزم نہیں بلکہ ذمہ داری ہے۔ انہوں نے کہا کہ پاکستان میں ری سائیکل شدہ پلاسٹک سے تیار ہونے والا دوسرا فیول اسٹیشن کمپنی کی جدت اور ماحولیاتی ذمہ داری کو اجاگر کرتا ہے۔
ان کا کہنا تھا کہ 58 لاکھ سے زائد پلاسٹک ویسٹ پیسز کو دوبارہ استعمال کر کے یہ اسٹیشن محض ایک فیول اسٹیشن نہیں رہا بلکہ ایک صاف اور سرسبز پاکستان کی علامت ہے۔
یہ بھی پڑھیں: شیل کا پاکستان میں کاروبار ختم کرنے کا اعلان؟
تقریب میں سعودی عرب کے سفارتخانے کے کمرشل اٹاشی نائف اے الحاربی، ریجنل پولیس آفیسر راولپنڈی بابر سرفراز آلپا، سٹی پولیس آفیسر سید خالد حمدانی اور اوگرا کے سینئر ایگزیکٹو ڈائریکٹر میڈیا ریلیشنز عمران غزنوی نے بھی شرکت کی۔ ان شخصیات کی موجودگی اس منصوبے کی اہمیت اور پائیدار توانائی کے لیے مشترکہ عزم کی عکاسی کرتی ہے۔
راولپنڈی میں نیا اسٹیشن وافی انرجی کی اس قیادت کو اجاگر کرتا ہے جو توانائی کے شعبے میں پائیدار اقدامات کو آگے بڑھا رہی ہے اور پاکستان کو کلائمیٹ ریزیلینس اور صاف مستقبل کی جانب لے جانے کے لیے عملی اقدامات کر رہی ہے۔
وافی انرجی پاکستان لمیٹڈ کا پس منظر
وافی انرجی پاکستان لمیٹڈ (سابقہ شیل پاکستان لمیٹڈ) پاکستان میں شیل کا لائسنس ہولڈر ہے۔ 2024 میں وافی ہولڈنگ نے شیل پاکستان لمیٹڈ میں 87.78 فیصد شیئرز حاصل کیے، جس کے ساتھ ہی یہ خلیجی ممالک سے پاکستان میں توانائی کے شعبے میں ایک اہم اسٹریٹیجک سرمایہ کاری کے طور پر سامنے آیا۔ یہ سرمایہ کاری محض ملکیت کی تبدیلی نہیں بلکہ پاکستان کے فیول ریٹیل انفراسٹرکچر میں ایک نئے دور کا آغاز ہے۔
وافی ہولڈنگ کی ایک وابستہ کمپنی کے پاس سعودی عرب میں شیل برانڈ کے فیول اسٹیشنز کے لیے شیل برانڈز انٹرنیشنل اے جی کے ساتھ خصوصی معاہدہ بھی موجود ہے۔ پاکستان میں یہ سرمایہ کاری وافی ہولڈنگ کے توانائی کے بزنس کو وسعت دینے اور اپنی موجودگی کو مستحکم بنانے کی حکمت عملی کا حصہ ہے۔
پاکستان میں شیل کی 77 سالہ تاریخ کے ساتھ، وافی انرجی پاکستان آج بھی توانائی کے شعبے کا ایک اہم پارٹنر ہے، جو ملک بھر میں 600 سے زائد شیل ریٹیل سائٹس، آئل ٹرمینلز، لبریکنٹس آئل بلینڈنگ پلانٹ اور عالمی معیار کے لبریکنٹس برانڈز (ہیلیکس، رِیمولا اور ایڈوانس) کے ساتھ ایک وسیع نیٹ ورک رکھتا ہے، پاک عرب پائپ لائن کمپنی (پی اے پی سی او) کے زیر انتظام وائٹ آئل پائپ لائن میں سب سے بڑی پرائیویٹ انویسٹر بھی ہے۔
وافی ہولڈنگ کی یہ سرمایہ کاری پاکستان کے توانائی کے شعبے میں ترقی، جدت، مسابقت اور طویل مدتی پائیدار توانائی کے وژن کو نئی سمت دینے کے طور پر دیکھی جارہی ہے۔
