سماجی رابطے کی ایپ ’ٹک ٹاک‘ نے پاکستانی طلباء کے لیے 10,000 اسکالر شپس کا اعلان کیا ہے۔
سماجی رابطے کی مقبول ترین ایپ ’ٹک ٹاک‘ کی طرف سے جاری ایک آفیشل بیان میں کہا گیا ہے کہ ’ٹک ٹاک‘ ای ڈی سٹارٹ اَپ اڈکاسا پروگرام کے تحت ’سندھ ایجوکیشن فاؤنڈیشن‘ کے ساتھ مل کرصوبہ سندھ کے 10,000 مستحق طلبا و طالبات کے لیے ’ایگزام ریڈی‘ اسکالر شپ پروگرام شروع کررہا ہے۔
بیان میں کہا گیا ہے کہ اس پروگرام کا مقصد سیکھنے کے عمل کو بہتر نتائج کے لیے ڈیجیٹائز کرنا ہے۔
واضح رہے کہ 2022 کے اوائل میں ’ٹک ٹاک‘ اڈکاسا نے لاہور یونیورسٹی آف مینجمنٹ سائنس (لیمز) کے ساتھ ملک کر’ایگزام ریڈی‘ سکالرشپ پروگرام کا آغاز کیا تھا، جو کہ ہائی اسکول کے طلباء کے لیے آن لائن تعلیم اور فاصلاتی تعلیم کی سہولت کے لیے اپنی نوعیت کا پہلا ڈیجیٹل لرننگ پروگرام ہے۔
بیان میں کہا گیا ہے کہ اس سال کے شروع میں ’ایگزام ریڈی‘ اسکالرشپ پروگرام کا آغاز پاکستان بھر سے 18,000 مستحق طلباء کو آن لائن اسٹڈی گرانٹس دینے کے لیے کیا گیا تھا۔
اب’سندھ ایجوکیشن فاؤنڈیشن کے ساتھ شراکت داری سے سندھ کے پسماندہ علاقوں میں معیاری تعلیم کو فروغ دینے میں مدد ملے گی۔’ اس پروگرام کے تحت سندھ میں 9 ویں سے 12جماعت کے طلباء کو وظائف دیے جائیں گے۔
’ایگزام ریڈی‘ پروگرام لاکھوں پاکستانی طلباء کی مدد کے لیے بنایا گیا ہے،اس کے تحت نے کیمسٹری، فزکس اور ریاضی پر مشتمل 500 سے زیادہ تعلیمی ویڈیوز کو آن لائن کیا گیا ہے۔
’ٹک ٹاک‘ پر ان تعلیمی ویڈیوز کو پاکستانی طلباء نے بے حد پسند کیا۔ ’ٹک ٹاک‘ کی منیجر پبلک پالیسی پروگرامز اینڈ پارٹنرشپس برائے جنوبی ایشیا زارا بشارت ہگز نے کہاکہ: ‘ہم سمجھتے ہیں کہ تعلیم ایک بنیادی حق ہے اور طلباء تک رسائی اور نتائج کو بہتر بنانے میں ٹیکنالوجی کا کردار بھی انتہائی اہم ہے۔
