وفاقی کابینہ کی قومی سلامتی کمیٹی کا اہم اجلاس وزیراعظم شہباز شریف کی زیر صدارت آج اسلام آباد میں ہو گا۔
اجلاس میں آرمی چیف سمیت عسکری قیادت اور اعلی سول حکام شریک ہوں گے۔ کمیٹی ملکی مجموعی سیکیورٹی صورتحال کا جائزہ لے گی۔
ملک میں امن و امان کی صورتحال پر وزیر اعظم کو بریفنگ دی جائے گی۔
کمیٹی اجلاس میں 9 مئی کو پر تشدد مظاہروں کے دوران فوجی املاک کو نقصان پہنچانے والوں کے خلاف کارروائی کے ضمن میں بھی فیصلہ کیے جانے کا امکان ہے۔
قومی سلامتی کمیٹی کیا ہے؟
اپنے تیسرے دور اقتدار میں وزیر اعظم نواز شریف نے وفاقی کابینہ کی تشکیل نو کر تے ہوئے اسے کابینہ کی کمیٹی برائے قومی سلامتی کا نام دیا تھا۔ جس کا سربراہ وزیر اعظم ہوتا ہے۔
وزیر خارجہ، وزیر داخلہ، وزیر خزانہ، وزیر دفاع، چیئرمین جوائنٹ چیفس آف اسٹاف، آرمی چیف، نیول چیف، ایئر چیف مارشل اس کمیٹی کے مستقل ارکان ہیں۔
یہ کمیٹی قومی سلامتی، دفاع، خارجہ اور داخلی سیکیورٹی پالیسی وضع کرنے کی ذمہ دار ہے۔