دنیا کے مختلف ممالک کے ساتھ ساتھ پاکستان میں بھی سال کے پہلے سپر مون کا دلکش منظر آسمان پر دیکھا جا رہا ہے، جس نے رات کے نظارے کو غیر معمولی حد تک خوبصورت بنا دیا۔
سپارکو کے ترجمان کے مطابق سال کا پہلا سپر مون سورج غروب ہونے کے فوراً بعد مشرقی افق پر نمودار ہوا۔ یہ چاند اپنی معمول کی حالت کے مقابلے میں قریباً 6.6 فیصد زیادہ بڑا اور 13 فیصد زیادہ روشن ہے۔
*ملک بھر میں رواں سال کا پہلا سُپر مُون*
*چاند 6.6 فیصد بڑا ، 13فیصد زیادہ روشن* pic.twitter.com/udhb9ytjs3— Muhammad Irfan (@irfanahmad60173) October 7, 2025
ترجمان نے مزید بتایا کہ رواں سال کا سب سے درخشاں سپر مون 5 نومبر 2025 کو دکھائی دینے کا امکان ہے، جبکہ تیسرا اور آخری سپر مون 5 دسمبر کو دیکھا جا سکے گا۔
بیان میں یہ بھی کہا گیا کہ آج کا سپر مون سیارہ زحل کے نہایت قریب دکھائی دے رہا ہے، اور ناظرین زحل کو چاند کے بائیں جانب واضح طور پر دیکھ سکیں گے۔
کراچی سے سپر مون کے نظارے pic.twitter.com/bek9x53yfR
— Shahid Hussain (@ShahidHussainJM) October 7, 2025
سنگاپور میں ’ہنٹرز مون‘ کے نام سے پہچانا جانے والا یہ فل مون سمندری جہازوں کے اوپر جگمگا رہا ہے۔ اٹلی میں قدیم ٹیمپل آف سیٹرن (ہیکلِ زحل) کے عقب میں فل مون کا حسین نظارہ سیاحوں کی توجہ کا مرکز بنا ہوا ہے۔
انڈونیشیا کے دارالحکومت جکارتہ میں آزادی کی علامت مانی جانے والی قومی یادگار کے اوپر چمکتا ہوا سپر مون ایک دل موہ لینے والا منظر پیش کر رہا ہے۔
ادھر مشرقِ وسطیٰ میں فلسطین کے تاریخی شہر نابلس میں فل مون جبلِ عیبال کے پیچھے طلوع ہو کر سنہری روشنی بکھیر رہا ہے، جبکہ میانمار کے شہر رنگون میں بدھ مت کے پیروکار تھڈنگیوت تہوار منانے کے لیے بوٹاہٹانگ اور شویڈاگون پگوڈا میں جمع ہیں، جہاں پورے چاند کی رات کو روحانی عقیدت اور روشنی کے تہوار کے طور پر منایا جا رہا ہے۔
ماہرینِ فلکیات کے مطابق اس سپر مون کو ’ہارویسٹ سپر مون‘ کا نام دیا گیا ہے۔ یہ اس وقت ظاہر ہوتا ہے جب چاند اپنے مدار میں زمین کے سب سے قریب پہنچ جاتا ہے۔
