افغانستان سے متعلق ماسکو فارمیٹ کے اجلاس میں شریک پاکستان، چین، روس، ایران اور بھارت سمیت بڑی علاقائی طاقتوں نے مشترکہ اعلامیے میں کہا ہے کہ افغانستان میں کسی غیر ملکی فوجیوں کی موجودگی کی کوئی گنجائش نہیں ہونی چاہیے۔
اجلاس میں شریک ممالک نے اس بات پر زور دیا کہ تمام ریاستیں افغانستان کی خودمختاری، آزادی اور علاقائی سالمیت کا احترام کریں اور ملک کو بیرونی مداخلت سے محفوظ رکھنے کے لیے عملی اقدامات اٹھائیں۔
یہ بھی پڑھیں: ماسکو فارمیٹ اجلاس کے شرکا کا دہشتگردی کے خاتمے اور علاقائی تعاون بڑھانے پر زور
یہ اعلامیہ پیر کے روز روسی دارالحکومت ماسکو میں جاری کیا گیا۔
اجلاس اس وقت ہوا جب چند ہفتے قبل سابق امریکی صدر ڈونلڈ ٹرمپ نے بیان دیا تھا کہ واشنگٹن بگرام ایئر بیس واپس حاصل کرنے کی کوشش کر رہا ہےکیونکہ یہ چین کے قریب ہونے کے باعث دفاعی اہمیت رکھتا ہے۔
Lavrov opens up the 7th meeting of the Moscow Format talks on Afghanistan
Without missing a beat, the Russian FM throws shade at the West for continuing to 'seize sovereign Afghan financial assets' pic.twitter.com/5Fc3GmArfB
— RT (@RT_com) October 7, 2025
یہی فوجی اڈہ 2 دہائیوں تک افغانستان میں امریکی افواج کا مرکز رہا، جسے 2021 کے انخلا کے دوران خالی کر دیا گیا تھا۔
اعلامیہ کے نکات اور علاقائی موقف
ماسکو فارمیٹ کے اجلاس کے بعد جاری اعلامیہ میں کہا گیا ہے کہ شرکا نے اس بات پر اتفاق کیا کہ کسی بھی بہانے کے تحت افغانستان یا اس کے ہمسایہ ممالک میں غیر ملکی افواج کی موجودگی قابلِ قبول نہیں۔
’ہم افغانستان کو ایک خودمختار، متحد اور پرامن ریاست کے طور پر دیکھنے کے خواہاں ہیں، جو بیرونی دباؤ یا مداخلت سے آزاد ہو۔‘
اعلامیہ میں امریکا یا ٹرمپ کا نام لیے بغیر کہا گیا کہ افغانستان کے اندر یا اطراف کسی ملک کی فوجی تنصیبات کا قیام ’خطے کے امن کے لیے نقصان دہ‘ ہوگا۔
مزید پڑھیں: افغانستان کو بین الاقوامی قبولیت کی تلاش، عالمی سفارتی محاذ پر ہزیمت اٹھاتا بھارت کتنا مددگار ہو سکتا ہے؟
اجلاس میں پاکستان، چین، روس، بھارت، ایران، قازقستان، کرغزستان، تاجکستان اور ازبکستان کے خصوصی نمائندے شریک ہوئے۔
افغانستان کی عبوری حکومت کے وزیرِ خارجہ امیر خان متقی پہلی مرتبہ مکمل رکن کے طور پر شریک ہوئے۔
شرکا نے زور دیا کہ افغان حکومت دہشت گردی کے خاتمے کے لیے جامع اقدامات کرے تاکہ اس کی سرزمین کسی دوسرے ملک کے خلاف استعمال نہ ہو۔
بیان کے مطابق افغانستان کی زمین کسی بھی ملک کے خلاف حملوں یا دہشت گرد گروہوں کی پناہ گاہ کے طور پر استعمال نہیں ہونی چاہیے۔
پاکستان کا مؤقف اور علاقائی تناظر
پاکستان کی شرکت ایسے وقت میں ہوئی جب اسلام آباد اور کابل کے تعلقات میں تناؤ پایا جا رہا ہے۔
پاکستان کے مطابق تحریکِ طالبان پاکستان یعنی ٹی ٹی پی اور دیگر شدت پسند گروہ افغان سرزمین سے حملے کر رہے ہیں، تاہم طالبان حکومت اس الزام کی تردید کرتی ہے۔
اس کے باوجود پاکستان نے طالبان انتظامیہ سے سفارتی روابط برقرار رکھے ہوئے ہیں۔ کابل میں پاکستانی سفارت خانہ فعال ہے اور دونوں ممالک کے درمیان اعلیٰ سطحی وفود کے تبادلے جاری ہیں۔
مزید پڑھیں: ‘اگر افغانستان نے بگرام ایئربیس واپس نہ کیا تو دیکھنا میں کیا کرتا ہوں،’ ٹرمپ کی دھمکی
حالیہ مہینوں میں پاکستان، چین اور افغانستان کے درمیان سہ فریقی بات چیت میں چین پاکستان اقتصادی راہداری یعنی سی پیک کو افغانستان تک توسیع دینے پر بھی اتفاق ہوا ہے۔
پاکستان کے خصوصی نمائندہ برائے افغانستان محمد صادق خان نے ایک سوشل میڈیا پوسٹ میں بتایا کہ ماسکو اجلاس کے دوران پاکستان، چین، روس اور ایران کا ایک علیحدہ چہار فریقی اجلاس بھی منعقد ہوا۔
🇵🇰 At the Moscow Format Consultations on Afghanistan, Pakistan reaffirmed its unwavering commitment to a peaceful, stable, and secure Afghanistan. I spoke about the urgent need for collective regional efforts to effectively counter terrorism and dismantle all terrorist groups… pic.twitter.com/CULEyAg821
— Mohammad Sadiq (@AmbassadorSadiq) October 7, 2025
ان کے مطابق شرکا نے متعدد نامزد دہشت گرد تنظیموں، بشمول ٹی ٹی پی، بی ایل اے، جیش العدال، داعش اور القاعدہ، کی موجودگی پر گہری تشویش کا اظہار کیا۔
بیان میں اس امر پر زور دیا گیا کہ افغانستان کو دہشت گردی سے مکمل طور پر پاک کرنے کے لیے مشترکہ اقدامات کیے جائیں تاکہ خطے کی سلامتی متاثر نہ ہو۔
علاقائی تعاون اور معاشی رابطے
اجلاس کے شرکا نے افغانستان کے ساتھ تجارتی و معاشی شراکت داری کو وسعت دینے پر بھی اتفاق کیا، تاکہ پائیدار ترقی، زراعت، صحت اور غربت میں کمی کے منصوبوں کو فروغ دیا جا سکے۔
بیان میں کہا گیا کہ بین الاقوامی برادری افغان عوام کو انسانی امداد فراہم کرنے کا سلسلہ جاری رکھے۔
تمام ممالک نے کہا کہ کسی بھی ملک کی جانب سے افغانستان یا اس کے ہمسایہ ممالک میں فوجی ڈھانچے کی تعیناتی ’ناقابلِ قبول‘ ہے اور ایسی سرگرمیاں خطے کے امن کے لیے نقصان دہ ہوں گی۔
پس منظر اور تجزیہ
ماسکو فارمیٹ 2017 میں قائم کیا گیا تھا اور یہ افغانستان کے حوالے سے سب سے نمایاں علاقائی پلیٹ فارم سمجھا جاتا ہے، جو ہمسایہ ممالک اور بڑی طاقتوں کو ایک مشترکہ مکالمے میں لاتا ہے۔
تجزیہ کاروں کے مطابق یہ فورم علاقائی طاقتوں کے لیے طالبان پر دباؤ بڑھانے کا ایک ذریعہ ہے تاکہ وہ انسانی حقوق، جامع طرزِ حکمرانی اور انسدادِ دہشت گردی سے متعلق بین الاقوامی توقعات پر پورا اتریں۔
مزید پڑھیں: 20 سال مزید جنگ کے لیے تیار ہیں، بگرام ایئربیس دوبارہ حاصل کرنے کی امریکی دھمکیوں پر طالبان کا ردعمل
سیکیورٹی ماہر سید محمد علی کا کہنا ہے کہ یہ فورم افغان طالبان کو باور کراتا ہے کہ بین الاقوامی سطح پر ان کی سیاسی ساکھ اور اقتصادی استحکام، ان کے رویے اور پالیسیوں پر منحصر ہے۔
سینوبر انسٹیٹیوٹ کے ایگزیکٹو ڈائریکٹر ڈاکٹر قمر چیمہ کے مطابق پاکستان طالبان کو یہ احساس دلانے کی کوشش کر رہا ہے کہ وہ اب ایک ریاست کے حکمران ہیں، غیر ریاستی عناصر نہیں۔
’علاقائی ممالک کا مشترکہ دباؤ طالبان کو زیادہ ذمہ دار طرزِ حکمرانی کی طرف لے جا سکتا ہے، جو خطے کے امن کے لیے ناگزیر ہے۔‘
