قومی احتساب بیورو (نیب) نے سال 2025 کی تیسری سہ ماہی کے دوران 1.10 ٹریلین روپے (1,100 ارب روپے) کی ریکوری کر کے قومی خزانے میں تاریخی اضافہ کیا ہے۔
یہ رقم گزشتہ سہ ماہی کے مقابلے میں 242 فیصد زیادہ ہے، جو نیب کی اب تک کی بہترین مالی کارکردگی قرار دی جا رہی ہے۔
2025 کی مجموعی ریکوری 1.65 کھرب روپے تک پہنچ گئی
نیب کے اعداد و شمار کے مطابق، سال 2025 کی پہلی 3 سہ ماہیوں میں مجموعی ریکوری کی مالیت 1,649.36 ارب روپے (1.65 کھرب روپے) ہو گئی ہے۔
یہ بھی پڑھیے نیب کا بڑا اقدام، ذوالفی بخاری کی 800 کنال زرعی اراضی نیلام کرنے کا فیصلہ
یہ رقوم مختلف کرپشن، زمینوں کی غیر قانونی الاٹمنٹ، اور عوامی دھوکہ دہی کے کیسز میں بازیاب کی گئیں۔
عوامی دھوکہ دہی کیسز میں 17 ہزار متاثرین کو فائدہ
نیب کے مطابق، صرف اس سہ ماہی میں 17,194 متاثرین کو مختلف عوامی فراڈ کیسز میں ریکور شدہ رقوم کی واپسی سے فائدہ پہنچا۔
اسی سلسلے میں B4U کیس کے 5008 متاثرین کو پہلی بار آن لائن ادائیگیوں کے ذریعے رقوم کی تقسیم کی گئی جو شفافیت کے نئے دور کی علامت قرار دی جا رہی ہے۔
کراچی سے خیبر تک ریکوری کی نئی مثالیں
نیب کراچی نے کراچی پورٹ ٹرسٹ (KPT) کیس میں 2.8 ارب روپے مالیت کے 2 قیمتی پلاٹ بازیاب کر کے ٹرسٹ کے حوالے کیے۔
دوسری جانب نیب سکھر نے نیشنل ہائی وے اتھارٹی کی 361 ایکڑ اضافی اراضی، مالیت 2.5 ارب روپے، بازیاب کرائی۔
جنگلاتی اراضی کی تاریخی واپسی ، 1.39 ملین ایکڑ منگرووز زمین بازیاب
نیب کی تیسری سہ ماہی رپورٹ میں سب سے بڑی کامیابی ماحولیاتی تحفظ کے حوالے سے سامنے آئی۔ بیورو نے 1.39 ملین ایکڑ منگرووز جنگلاتی اراضی بازیاب کرائی، جس کی مالیت 1,104.97 ارب روپے بتائی گئی۔ اس کے بعد جنگلاتی اراضی کی مجموعی ریکوری کی مالیت 2.59 کھرب روپے تک پہنچ گئی ہے۔
بلوچستان اور خیبر پختونخوا کی ریکوریز بھی نمایاں
نیب بلوچستان نے 414,036 ایکڑ جنگلاتی زمین، مالیت 44.8 ارب روپے، بازیاب کرائی، جبکہ نیب خیبر پختونخوا نے 3.2 ارب روپے مالیت کی غیر قانونی طور پر الاٹ شدہ ریاستی زمین واپس لے کر وزارتِ صنعت و پیداوار کے حوالے کی۔
قومی معیشت کی بحالی میں نیب کا فعال کردار
نیب حکام کے مطابق، ریکوریز سے حاصل شدہ رقوم اور اراضی کے قومی خزانے اور اداروں کو حوالے کیے جانے سے قومی معیشت کو براہ راست فائدہ پہنچا ہے۔
یہ بھی پڑھیے کوہستان 40 ارب روپے کرپشن اسکینڈل: نیب نے 5 مزید ملزمان گرفتار کرلیے
ترجمان کے مطابق، ’نیب کی حالیہ کارکردگی نہ صرف بدعنوانی کے خلاف عزم کی عکاس ہے بلکہ ملکی معیشت کی بحالی میں بھی ایک مضبوط قدم ہے۔‘
