کراچی میں ٹریفک پولیس کی جانب سے ای چالان نظام کے باضابطہ آغاز کے بعد ٹریفک قوانین کی خلاف ورزیوں کے خلاف مؤثر کارروائیاں شروع کر دی گئی ہیں۔
ترجمان ٹریفک پولیس کے مطابق، سسٹم کے نفاذ کے بعد اب تک مجموعی طور پر 2662 الیکٹرانک چالان جاری کیے گئے ہیں۔
یہ بھی پڑھیے: کراچی میں کتنے کیمرے لگے ہیں، اگر کیمروں نے کام کرنا چھوڑ دیا تو چالان کیسے ہوگا؟
رپورٹ کے مطابق، اوور اسپیڈنگ، لین لائن اور اسٹاپ لائن کی خلاف ورزی، سیٹ بیلٹ نہ باندھنے، ریڈ لائٹ کراس کرنے، ہیلمٹ کے بغیر موٹرسائیکل چلانے، کالے شیشے لگانے، غلط اور نو پارکنگ زون میں گاڑیاں کھڑی کرنے، موبائل فون کے استعمال اور رونگ وے پر گاڑی چلانے جیسے مختلف جرائم پر کارروائیاں عمل میں لائی گئیں۔
ان میں سب سے زیادہ چالان سیٹ بیلٹ نہ باندھنے پر کیے گئے جن کی تعداد 1532 رہی، جبکہ اوور اسپیڈنگ کے 419 اور ہیلمٹ کے بغیر موٹرسائیکل چلانے پر 507 چالان جاری کیے گئے۔
یہ بھی پڑھیے: لاہور میں ٹریفک چالان جمع نہ کروانے پر کاریں، بائیکس کی نیلامی کا خطرہ
ٹریفک پولیس کے مطابق، افتتاحی روز نظام میں چند تکنیکی بہتریوں پر کام جاری تھا، جس کے بعد ای چالان سسٹم کو مکمل طور پر فعال کر دیا گیا ہے۔ ڈی آئی جی ٹریفک نے کہا کہ یہ نظام شہریوں میں ٹریفک قوانین کی پاسداری کو یقینی بنانے اور مؤثر نگرانی کے لیے ایک اہم سنگِ میل ثابت ہوگا۔
انہوں نے مزید کہا کہ عوامی تعاون سے یہ نظام مزید مؤثر بنایا جا رہا ہے۔ شہریوں سے اپیل کی گئی ہے کہ وہ ٹریفک قوانین کی مکمل پاسداری کریں تاکہ شہر میں ٹریفک کا نظام بہتر ہو اور حادثات میں نمایاں کمی لائی جا سکے۔
